Сапожникова И.. Мечта о русском единстве. Киевский синопсис (1674)

23.
О ПЕРВОМ ПОХОДЕ ОЛЬГИ
к Древляном.

   ВЕЛИКАЯ КНЯГИНЯ Ольга по обещанию своему со уготованными многими людьми не тако к веселию, яко к бою на урочное время пойде до Коростеня. Древляне же цветно коньми и одеждами украсившеся, изыдоша ей в стретение, и приемше ю с велиею честию, вопрошаху о послах своих первых и вторых; и отвеща им, яко по нас иным им ведомым путем со всем имением моим и богатствы идут. И тако по приговору своему с Древляны, пойде прежде брака на гроб мужа своего Игоря и плакася над ним; помины же совершивши, повеле велику могилу над Игорем высыпати; а Древляне рекоша к ней: мужа твоего мы убихом, яко он не бе милосерд к нам, не аки Государь с подданными, но яко волк со овцами управляшеся. Тогда Ольга сокрывши в сердце своем жалость и ярость, облечеся в цветныя драгоценныя одежды, аки на брачно веселие, и нача учреждати различным питием Древлян честно, а своим людем заповеда отнюдь не пити. Егда же Древляне вси упишася, абие внезапу повеле их своим на то устроенным людем посещи; и погибе Древлян в то время пять тысящ. И тако Ольга смесивши с кровию Древлянскою свадьбу, возвратися в Киев.

24.
О ВТОРОМ ПОХОДЕ ОЛЬГИНОМ
к Древляном.

   ПОТОМ ПАКИ Великая Княгиня Ольга с великою силою пойде на Древляны с сыном своим Святославом или Светославом Игоревичем, наставляя и его к отмщению смерти отеческия, и порази велику рать Древлянску на бою, а бежащих от побоища гнаше даже до главнаго града их Коростеня, идеже затворишася Древляне: а Ольга доставаше их, весь год стоя под градом неотступно. Видящи же премудрая Княгиня Ольга, яко неудобь взяти града приступами, вдася к хитростному промыслу, и посла ко всем гражданом глаголя: яко уже отмстила есмь смерть мужа своего, обаче не отступлю от вас, дондеже ми куюлибудь дань дасте; а не хощу большия, точию дадите ми в дань всяк от себе по три голубя и по три врабии. Древляне же ни во что сию дань яко женска разума вменьше, абие ту с велиим тщанием исполниша: а Ольга всякому голубю, и врабию повеле в ошибы и в крыла управити устроенныи фитили с серою, и запаливши фитили, пустити их в вечер; голубь же всяк к своему дому и врабий к стресе с огнем прилетевши, на многих местах град зажгоша: а Ольга горящу граду, абие всею силою нача приступати от всех стран под город. Тогда от возгорения града бежащих велие множество Древлян побиша; инии с женами и детьми погореша, иныи многии пленены быша. И тако мудрая и храбрая Княгиня Ольга, отмстивши мужа своего смерть, прият в свою область вся грады Древлянския и возвратися в напрестольный свой град Киев с велиею радостию с сыном своим Светославом.

25.
О ПОХОДЕ ОЛЬГИ
к Цариграду и о крещении ея.

   ЛЕТА ОТ СОЗДАНИЯ МИРА 6463, а от Рождества Христова 955, Великая Княгиня Киевская и всея России Ольга с великим имением в строи нарочитом кораблями пойде к Цариграду, и пришедши с Русскими Боляры и Дворяны пред лице Кесаря Греческаго, по Стрийковскаго свидетельству, Иоанна Земиски, или Цимисхия, а по летописанию преподобнаго Нестора Печерскаго, Константина Леонова сына, вдаде ему великие дары. Кесарь же прият ю благоговейно и честь достойную воздаваше. Возбуждшижеся красотою, славою и храбростию ея и широтою Государств Российских, рече к ней: достоит ти, Ольго, быти Царицею Еленою, и на царствии Гречестем купно с нами в сем нашем граде главном Цариграде обитати; и понуждаше ю в союз брачный с собою, зане вдов бяше. Ольга же на сие отвеща ему: Кесарю! Аз есмь поганка, а зде приидох веры вашея Христианския научитися; аще хощеши мене в жену себе, окрести мя. Тогда Патриарх Цариградский Полиевкт, а по свидетельству Летописца Зонары, Феофилакт, поучивши ю вере Христианстей, окрести со многими Российскими боляры; сам же Кесарь по прошению бысть ей восприемник, или отец крещенный; дано ей имя Елена, по подобию первыя Царицы Греческия Елены. По крещении же проси Кесарь Елену на пир к себе, идеже беседуя о мнозе, и се рече к ней: да будет ему жена, якоже сама обещася. Но Елена отвеща ему: како можеши мя дщерь свою крестную в жену прияти? ибо не точию в Законе Христианстем, но и в поганстем скверно есть и отметно, отцу дщерь свою жену водити. Усумнежеся о сем Кесарь и рече к ней: прехитрила мя еси, Ольго. И давши ей великие дары, отпусти ю в свояси. Елена же прииде к Святейшему Патриарху благословения ради в путь и в дом свой, глаголющи: сын мой Светослав есть поганин и людие все суть поганы; да избавит мя Господь Бог, Святейший Отче, благословением и Святительскими твоими молитвами от всякаго зла. Патриарх же рече к ней: дщи моя верная о Христе, в него же окрестилася еси, Христа и облекла! той тя сам избавити и соблюсти имать от всякаго злаго обстояния, яко избави Ноя от потопа, Лота от Содомлян, Моисея с Израилем от Фараона и дому работы, Давида от Саула, Даниила от уст львов, триех отрок от пещи; тако и тебе избавит от всякия напасти. Благословенна бо еси в женах Российских; блажити тя будут вси роды Российскии в последнем роде и в внуках твоих. И се рек, даде ей благословение и Пресвитера, и отпусти ю. Возвратившижеся Великая Княгиня Ольга первоначальная от святаго крещения мати Российская Елена в Киеве, много Россов к Христу обрати и крещением святым яко солнцем тму идолослужения прогна и омраченныя просвети, и в Киеве первую от себе Церковь святаго Николая на Оскольдовой могиле постави. Но сына своего Светослава всякими мерами не возможе к Христу и к познанию истиннаго Бога обратити; зане зело муж храбр бысть, и все свое житие воински ведяше. Сего ради и матери отвещаваше: егда бы (рече) аз окрестился, людие и сверстники мои сотворити сего не восхотят и мене отступят; мне же не будет с ким ратовати и отчизны заступати. Бысть же он сицеваго мужества воин, яко коль скоро лет своих дошед, на поле вящше с храбрыми своими вои обиташе, ни возов, ни шатров, разве опанчи, ни подкладов, ни котлов не взимаше. Ядь бо его бе суха, седание же на голой земли под небом и легание на седле и войлоку; сего ради роскошных и ленивых всяких народов побеждаше.

26.
О КНЯЖЕНИИ СВЯТОСЛАВА,
или Светослава Игоревича в Киеве, и о смерти Благоверныя Великия Княгини Елены.

   ЛЕТА ОТ СОЗДАНИЯ МИРА, 6463, а от Рождества Христова 955, Светослав Игоревич, внук Рюриков, приемши совершенную власть от матере своея Елены, по крещении ся нача княжити в Киеве над всеми Российскими Княжениями; подби же под свою область Козарей, людей Каспийских народов, и доста града их главна, егоже Беловесом звано, и Болгарских градов взя над Дунаем осмьдесят. Не сущу же Светославу в Киеве, Печенези от тех стран, идеже Волга и Яик, с прочими во многой силе пришедши под Киев, обступиша град. Ольга же, или Елена, затворившися в граде с трема внуки своими, сынами Святославлими, Ярополком, Ольгом и Владимиром, посла к Светославу ради заступления. Он же абие вскоре пришед, порази Печенеги. По сем глаголаше к нему Елена: сыне мой Светославе! уже аз отхожду от сего Света; ты же погребши мя, пойдеши, идеже хощеши. И тако аки пророчица смерти своея, третияго дне отъиде в чертог Царя Небеснаго; и плакася по ней сын ея Светослав, внуцы и вси людие, и погребена бысть Пресвитером, егоже при себе держаше, на месте, идеже заповедала, и поминаше ю Пресвитер Христианский. Кости же ея Великий Князь Владимир, внук ея, по крещении своем, за святые поднесе, и в Святых число есть вписана чрез Патриарха Цариградскаго Сергия, и оттуду Русь наша и день в память ея 11 Июля с Церковию празднует.

27.
О РАЗДЕЛЕНИИ КНЯЖЕНИЙ СВЕТОСЛАВА СЫНОМ СВОИМ
и о смерти его.

   ВЕЛИКИЙ КНЯЗЬ Киевский и всея России Самодержец Светослав Игоревичь по смерти матере своея Великия Княгини Елены раздели Княжения своя Российския трием сыном своим, Ярополку первейшему даде Киев, Ольгу среднему Древляны с Коростенем и Переяславлем грады, юнейшему Владимирови Новгород Великий по прошению граждан Великоновгородских: а сам не могий в тишине обитати, яко воинский муж, иде на Государства Греческии войною, царствующим Кесарем Василию и Константину. Порази же Греки, и грады многии побра и велие разорение содела. Егда же прочии Князие искаху у него чрез различные дары покоя, Светослав от них не хотяше брати ни злата, ни сребра, ни бисерей, точию оружие, щиты, мечи и паволоки; чесо ради смути весь народ Греческий, и восташа на Князей своих рекуще: яко под сицеваго Кесаря державою добре есть быти, иже ни злато, ни сребро, ни бисеры, но оружие вящше и броня, ради заступления отчины и наследия своего, любить. Егда же с велиею славою возвращашеся к Киеву, заступиша ему путь Печенези, на месте злом к бою неудобном, между порогами не далече Белобережья, и озиме тамо в осаде. На весне же нападе Князь Печенежский Куря или Курес и порази Русь, а Светослава жива вземши, повеле ему главу отсещи и соделати от кости ея чашу, златом обложенну с сицевым надписанием: ищай чужаго, свое погубляет. Пияше же от тоя чаши всегда, веселяся о славной победе над Светославом. И бысть княжения Светославля лет всех 28.

28.
О КНЯЖЕНИИ ЯРОПОЛКА
Светославича в Киеве.

   ПО СМЕРТИ ОТЦА своего Светослава Игоревича, Самодержца Российскаго, нача Ярополк княжити в Киеве и во всей России: обаче с братиею своею Ольгом и Владимиром (аще от своего отца чинно и по ряду княжениями разделены быша) не возможе в мире и согласии жити. Ибо поущением никоего еще отеческаго нарочита советника Свинделда или Свя&толда, воста на брата своего Ольга, Князя Древлянскаго, и порази рать Древлянску: а Князь Ольг убегающи в град свой Варич, ныне зовомый Овручов, и не могий между велиим множеством бежащих людей в город протиснутися, с моста высока с прочим народом низвержен бысть, идеже спадше, множество людей угнетоша его до смерти, его же еле по триех днех между трупы обретше, принесоша к Ярополку, и плакася над ним Ярополк глаголя к Святолду: се зри, Святолде, на труп брата моего; зане того еси хотел. Ибо Святолд баснь некую на Ольга вземши, возбуди на его Ярополка. Владимир же, Князь Великоновгородский, яко услыша о убиении от Ярополка брата своего Ольга, абие убояся и себе подобна зла, и побеже за море к Варягом: а Ярополк пришедши к Новгороду Великому, взя его и посади в нем Наместника своего. Приемши же в свою власть Княжения братии своея, соделася всея России Самодержец.

29.
О ПРИШЕСТВИИ ВЕЛИКАГО
Князя Владимира Светославича в Киев.

   ЛЕТА ОТ СОЗДАНИЯ МИРА 6489, а от Рождества Христова 981 Владимир Светославич, Князь тогда сущи Великоновгородский, с многою силою Варягов возвратися к своему Княжению, и абие взя в свою прежнюю власть Великий Новгород; Наместника же Ярополча изгна, а своего некоего именем Добрыню посадивши, сам с многими ратьми пойти на Ярополка брата устремися. Прежде же походу своего до Киева посла Владимир к Рогволду, Князю Полотскому, да ему даст дщерь свою Рогнеду, или Рохмиду в жену.
   Но Рогнеда не хотяше, желая себе брачнаго союза с Ярополком. Владимир же разгневася, яко укорен бе, и абие пойде на Рогволда, Князя Полотскаго, егоже силу победи, самаго и двух сынов его уби, а Рогнеду взя себе в жену. По сем с готовыми ратьми иде Владимир к Киеву на брата своего Ярополка, и пришедши под град Киев, ста и окопася на Дорожници, идеже ров есть и до сего дне. Ярополк же затворися в Киеве. Но Владимир видя, яко неудобь воинским промыслом взяти града, посла тайно к воеводе Киевскому, именем и вещию Блуду, обещая ему велию честь и дары, дабы ему помогл брата Ярополка убити. Блуд же, яко враг и изменник Государя своего Ярополка, абие Владимирову желанию обещася довлесотворити, советуя ему, да всячески приступает под город; а Ярополка лестию поущаше к бегству из града. И тако Ярополк не разумея Блудова лестна коварствия, побеже из Киева к граду Городеню, иже бысть на устье реки Сулы, мнящи тамо от Владимира уцелети. Но Владимир вземши Киев в свою власть, пойде с силою многою за Ярополком, и обдеже его в Городене, идеже паки окаянный Блуд советова Ярополку, молити Владимира о смирении, аки сильнейша от себе брата; и к Владимиру льстец посла, обещая ему абие Ярополка предати. Повинувжеся Ярополк советованию Блудову, пустися на милость братнюю и иде к Владимиру. Но егда исхождаше из врат градских, абие два Варяга подъяша его мечами под пазухи, Владимиру на сие от единыя вежи сматрящу. Сеже все содевашеся похотию господствования, егоже ради Ярополк брата Ольга уби, а Ярополка брат Владимир смерти предаде.

30.
О КНЯЖЕНИИ ВЕЛИКАГО КНЯЗЯ
Владимира в Киеве и во всей России, и о Самодержавствии его.

   ЛЕТА ОТ СОЗДАНИЯ МИРА 6486, а от Рождества Христова 978, Великий Князь Владимир Светославич, идущ от корене Августа Кесаря Римскаго, владевшаго всею Вселенною, внук Игорев, правнук Рюриков, по смерти братии своея Ольга и Ярополка, объемши их Княжения и всю Россию полунощную, восточную, полуденную, Белую и Черную к своей власти приведши, нача писатися Царем и Великим Князем и Самодержцем Российским. Созда же и град велик и красен пятьнадесять верст от Киева, нарекши его Белгород, и престол Княжения Великоновгородскаго в Киев пренесе. Поминая же братию убиенную, нача ставити богомерзкие Идолы в Киеве и по окрестных горах и полях Киевских, творя им честь и поклонение божественное сам, и всем людем повелеваше творити, а противным имения, отчины и достоинства отъемляше.

31.
О ИДОЛЕХ.

   В ПЕРВЫХ ПОСТАВИ начальнейшаго кумира, именем Перуна, бога грому, молнии и облаков дождевных на пригорку высоком над Боричовым потоком по подобию человеческу: туловище его бе от древа хитростне изсечено, главу имущ слиянну от сребра, уши златы, ноз железны, в руках же держаше камень, по подобию перуна пылающа, рубинами и карбункулем украшен; а пред ним огнь всегда горяше. Аще же бы по нерадению жреческому ключилося огню угаснути, того жреца, аки врага бога своего, смертию казняху ^[13]. Вторый идол бысть Волос, бог скотов.
   Третий Позвизд; инии же прозваша его Похвист, неции нарицаху Вихром, исповедающе бога быти воздуха, ведра и безгодия. Четвертый идол Ладо; сего имеяху бога веселия и всякаго благополучия; жертвы ему приношаху готовящиися к браку, помощию Ладамнящее себе добро веселие и любезно житие стяжати. Сия же мерзость от древнейших идолослужителей произыде, иже некиих богов Леляи Полеляпочитаху, их же богомерзкое яяимя и доныне по неким странам на сонмищах игралищных пением Лелюм Полелюмвозглашают. Такожде и матерь Лелеву и Полелеву Ладупоюще, Ладо Ладо, и того идола ветхую прелесть Диавольскую на брачных веселиях рукама плещуще и о стол биюще воспевают; и от сего православному Христианину всячески блюстися подобает, да не возбуждение казни Божия бывает. Пятый идол Купало, егоже бога плодов земных быти мняху, и ему прелестию бесовскою омраченныи благодарения и жертвы в начале жнив приношаху. Тогожде Купалабога, или истиннее беса, и доселе по неким странам Российским еще память держится; наипаче в навечерии рождества Святаго Иоанна Крестителя, собравшеся в вечер юноши мужеска, девическа и женска полу, соплетают себе венцы от зелия некоего и возлагают на главу и поясуются ими; еще же на том бесовстем игралищи кладут и огнь, и окрест его, емшеся за руце, нечестиво ходят и скачут и песни поют, сквернаго Купалачасто повторяюще и чрез огнь прескачуще, самих себе томуж бесу Купалув жертву приносят; и иных действ диавольских много на скверных соборищах творят, их же и писати нелепо есть. Посем Святаго Иоанна Крестителя празднице еще и о празднице Святых верховных Апостол Петра и Павла свою сеть Диавол запинает чрез колыски, на них же колысущимся приключается внезапу спасти на землю, убиватися и зле без покаяния душу свою ипущати. Сего ради и колысок, яко сети диавольския хранитися всякому Христианскому человеку, да не впадет и увязнет в ню, нужда есть.

О облиянии водою на Велик День.

   НЕЦИИ ОТ ДРЕВНИХ беззаконник источником и езером умножения ради плодов земных жертвы приношаху, а временем и людей в воде топяху. По некиих странах Российских еще и доселе древняго того безчиния отновляется память, егда во время пресветлаго дне Воскресения Христова собравшеся обоего полу юноши и старыи, друг друга по подобию некоего утешения в воду вкидают, и случается наваждением бесовским вверженному в воду или о камень, или о древо разбитися, или утопати, и зле испущати душу свою. Иные же, аще не вкидают в воду, то поливают водою, томужде бесу жертву древних забобонов отновляюще, а ныне в обычай утешения, а не жертвы идолския творят; обаче лучше бы и тому не быти. Шестый идол Коляда, бог праздничный, ему же праздник велий месяца Декемвриа в 24 день составляху. Обаче аще людие Российскии и Святым Крещением просветишася и идолы искорениша, но неции памяти того беса Колядыи доселе не престают отновляти, наченше от самаго Рождества Христова по вся святыя дни собирающеся на богомерзкия игралища, песни поют и в них, аще и о Рождестве Христовом воспоминают, но здеже беззаконно и Коляду, ветхую прелесть диаволскую, много повторяюще присовокупляют. Ксему на тех же своих законопротивных соборищах и некоего Турасатану и прочия богомерзкия скареды измышляюще, воспоминают. Иные лица своя и всю красоту человеческую по образу и по подобию Божию сотворенную некими харями, или страшилами, на диаволский образ пристроенными, закрывают, страшаще, или утешающе людей, Творца же и Зиждителя своего укаряюще, и акибы не довольствующе или мерзящеся творением руку его; что всячески подобало бы Христианскому человеку оставити, а сим образом, им же его сотвори Господь, довольствоватися: и прочия богопротивныя мерзости измышляемы бывают, их же и писанию предати не подобает.
   Разве тех бесовских кумир, еще и иныи идолы мнози бяху по имени Усладили Осляд, Коршаили Хорс, Дашубаили Дажб, Стрибили Стрибог, Семаергляили Семаргли Макош, или Мокош, им же бесом помраченныи людие аки Богу жертвы и хваления воздаваху. Сия мерзость во всем Государстве Владимировом по повелению его содевашеся.
   Посла же Великий Князь Российский Владимир на свое место в Великий Новгород племянника своего именем Добрыню; и той достигши Велика Новгорода, яко в Киеве виде Владимира творяща, тако, подражая ему, соделоваше тамо, идолы ставляше, богами их нарецая и людем кланятися и требы им приносити нуждею повелеваше.

32.
О ЖЕНАХ ВЛАДИМИРОВЫХ.

   ВЛАДИМИР ЖЕ ИМЕЯ в Государстве своем мир и тишину, похотию плотскою люто борим бяше. Шесть бо жен име: первая именем бе Рохмида или Рогнеда, Княжна Полотская, от неяже роди четыре сыны, Изяслава, Мстислава, Ярослава, Всеволода и две дщери; вторая Грекиня, жена брата Ярополка: а от нея роди Святополка, иже потом братию свою Бориса и Глеба поби; третия княжна Чехиня: а от тоя име Вышеслава; четвертая такожде Чехиня, от неяже роди Святослава и Станислава; пятая Болгарыня, от тоя роди Бориса и Глеба; шестая потом бе Грекиня Анна, еяже ради крестися, из нея же име дщерь Марию, яже отдана бысть в жену первому Казимиру, Королю Польскому, и сия роди Болеслава Смелого, иже уби Станислава, Бискупа Краковскаго.
   Разве тех жен еще име подложниц 300 в Вышеграде, в Берестове и в Себрах двесте, а на Белагороде триста; всех числом осмь сот. Не довольствовася же и толиким подложниц множеством; но еще и девици идеже возлюбися ему, и от мужей жены взимаше, толиким похоти раждежением Соломону подобяшеся: обаче творяше сие Владимир, егда в тме идолослужения бысть. Потом же егда небесным светом Крещения святаго просветися, в разум истинный пришед, уже сицевыми богомерзостьми сам гнушашеся и прочим творити я возбраняше.

33.
О ХРАБРОСТИ ВЛАДИМИРОВОЙ.

   САМОДЕРЖАВСТВУЯ ЖЕ ВЛАДИМИР во всей России, обрати свое помышление к брани и храбрости воинственной. Первое поднесе брань воинскую на Мечислава, Князя Польскаго, и взя под ним град Перемышль и Червень и волость Радомысльскую и иных много. Победи же и Вятичи и наложи на них дань по шелегу (меньше полушки) от плуга. Потом Владимир иде с войском великим за Дунай, и взя в свою область земли Болгарскую, Сербскую, Карватскую, Седмиградскую, Вятицкую, Ятвязскую, Дулепскую, Волосскую, Мултянскую и Татаров Бобруцких, и дань на всех их возложи, юже прежде Греческим Кесарем даяху.

34.
О БЕЛГОРОДЕ,
како киселем от осады свободися.

   СУЩУ ВЛАДИМИРУ НА ВОЙНЕ, приидоша Печенези и обступиша Белгород Киевский, идеже подложницы Владимировы бяху, и утвердиша слово с собою под градом стояти, дондеже гладом истают. Но егда уже граждане хотяху Печенегом сдатися, некий человек удержа их, и собравши идеже можашеся обрести брашна от пшеницы, овса и отрубей, повеле две кади киселю розчинити, а третию сыты медовой от Княжой медуши, и ископати три кладязя, а три кади в кийждо кладязь вставити, особ с киселем, а особ с сытою. Наутрие же призва неких от Печенегов начальных в град, и показа им кладязи с киселем и с сытою; а граждане пред ними черпающе кисель вариша и растворяюще сытою, сами ядоша и Печенегов кормиша; потом и в сосуды им довольно киселю и сыты давше, отпустиша из града, рекуще: аще вам не достает на поле корму под градом, се граждане вам посылают. Печенези же видяще чудно изобилие брашна и мняще гладом их не уморити, отступиша воспять; а Белгород сицевым хитростным промыслом от осады Печенежской свободися; человека же того, иже хитрость сию изобрете, прозваша Кисель: а сказуют его быти от племени и колена Свеньделда, или Святолда, нарочита советника Светославля и Владимирова.

35.
О ПОБЕДЕ ВЛАДИМИРОВОЙ
над Печенегами под Переяславлем, от нея же Переяславль создан и наречеся.

   ПОСЕМ УСЛЫША ВЛАДИМИР, яко Печенези положишася станом при реце Трубежу, устремляющеся на Киев; абие с готовыми ратьми пойде противу Печенегом и ополчися с вои своими по другой стране тояжде реки, идеже ныне град Переяславль. Печенези же видяще силу и храбрость Владимирову, послаша к нему, дабы выслал от Руси коего богатыря борца противу их богатыря братися на един, и от коея страны победоносец явится, сей побежденная страна имеяше покоритися. О сем Владимир услышавши, намнозе тужаще и печален пребываше зело, яко борец у него не обретеся. Но во время тоя печали Царстей пришед к нему некий стар муж (Переяславянин) и сказа, яко имат сына у себе сильна, ему же от детска никто не одоле; и рад бысть Царь сицевой вести, абие призва борца того, и вопроси его, может ли братися с Печенегом? борец же отвеща Цареви, да искусит его. Тогда повеле Царь по его совету привести вола сильна и разъярити его, еще же и железо нань распаленное возложити, егоже разгневанна и железом палима люто и скоро бежаща, ухвати борец за бок рукою и исторже кожу с мясом, елико могл заяти. Владимир же дивися силе: но усумневашеся, яко возрастом борец мал бе; обаче конец победы щастию поручая, посла к Печенегом, да посылают богатыря своего на средину; и абие Печенег он, человек толст и плечист, а возрастом вторый Голиаф, изыйде и ставши на средине плещьма и мышцами движущ, велиим воплем восклицаше к Руси, поношая им и не единаго, но триех противу себе воззывая. Тогда от страны Российския борец он мал муж, но связен, изыйде к борьбе на средину. Печенег же узрев его, поношаше ему и ругаяся нарицаше его черепахою. Абие же оба охватистася крепко рукама и начаша братися, Печенег величеством возраста, а Русин скоростию и тщанием успеваше: но яко мал бе Русин, восклонився розведе и удари Печенега в толстое чрево главою понадь лоном. Великий же Печенег не стерпев повалися, но абие воскочи и посрамлен сущи, лютым гневом и яростию разъярися аки лев и удари сильно кулаком малаго Русина; Русин же скор сый, отскочи от него с места: а Печенег аки тяжек Голиаф, лютаго ради разводу своего поткнуся и паде на землю. Тогда ускори Русин, наскочив нань, не даде ему паки исправитися, но крепко его аки коня оседла бияше в щоки, даже и зубы ему купно с кровью испадаху. Посем вземши за горло, души его сице на долзе, дондеже на том же месте и душу из него истрясе. Владимир же видя одоление борца своего, абие возгласи и тече с силою своею к печенегом и порази их на главу, яко иногда Саул чрез Давида Филистинов; и на том месте, идеже славная сия над Печенеги содеяся победа, основа Владимир город, и нарече его Переяслав, яко перея славу от Печенег Владимиру борец он славный. Польскии же летописцы сказуют, яко Переяславянин бе борец от села Переяславля; сего ради созда Владимир град и нарече его Переяслав; борца же почти славою велиею и отца его содела нарочитым мужем.

36.
О ПОСЛАХ РАЗЛИЧНЫХ
к вере Владимира увещавающих.

   ЕГДА ВЕЛИКИЙ КНЯЗЬ Владимир Монарх, или Самодержец всея России храбростию и величеством Царствия своего во всей подсолнечной паче иных прославися, мрак же бесовскаго прельщения, сиречь идолослужение, не у от него светом Крещения святаго прогнан бысть, начаша к нему приходити посланники от различных Царств и Княжений, всяк хвалящи свою веру. В начале убо приидоша Махометаны, их же Владимир вопроси о вере, а оны отвещаша: веруем Богу, а Махомет нам изволяет жен имети елико кто хощет, и всякия сласти употребляти, точию обрезоватися, свинаго мяса не ясти и вина не пити, и прочия неблагообразия предлагаху, яже и писати не лепо есть. Владимир же, яко женолюбив бе, прилежнее о женах послушаше, но обрезание и непитие вина не возлюбися ему, и рече к ним: не можем мы прибывати без вина; понеже в Россианех все веселие и приятельство в подпитии бывает. Такожде и Татаром, Египтяном, Аравляном, Немцом, Жидом и прочим отрече. Присылаше же часто и Римский Папа и Кесарь западный и Князи Немецкии, да примет их Веру и Закон Христианский: но Владимир соизволити им не хоте, яко уставы Латинскии мало набожныи и костелы их не вельми красны мняхуся ему быти; точию послы от Греческих Кесарей и Патриархов место у него с верою и уставами своими имеша, яко тойже Польский летописец Стрийковский свидетельствует.