37.
О ПОСЛАХ ГРЕЧЕСКИХ К ВЛАДИМИРУ.
ЕГДА УБО ПРИИДОША к Владимиру послы от Царей Греческих, Василиа и Константина, Кирилл Философ с прочими; тогда с Владимиром он Кирилл Гречин, яко премудр муж, беседова намнозе о Вере Христианстей, наченши от создания Мира по всем пророчествиям даже до воплощения Господа нашего Иисуса Христа, о крещении, о страстех, о распятии и тридневном его из мертвых воскресении. Последи же предложши слово о втором пришествии Христовом, о страшном суде, о муце грешным и о царствии безконечном праведным уготованном, вдаде ему в дар запону велику зла&тотканну от тех же Кесарей Греческих и от Патриарха присланну, на нейже бе хитростне изображен страшный суд Божий; на нюже Владимир смотря прилежно, проси Философа, да ему истолкует о сих, иже стоят одесную и иже стоят ошуюю; и поведа ему Философ, яко одесную станут, иже веруют в Господа нашего Иисуса Христа, единаго истиннаго Бога, и крещаются во имя Отца и Сына и Святаго Духа, и творят дела добрая; сии по смерти временной вечный живот и Царствие Небесное наследят: ошуюю же станут, иже не веруют в единаго истиннаго Бога и не крещаются, беззаконно же живут и дела злая по своих похотех творят; тыи в вечный огнь геенский на безконечное мучение, идеже червь неусыпает и скрежет зубный, пойдут. Сия услышав Владимир воздохну и рече: благословени сии, иже станут одесную; горе же тем, иже будут ошуюю; и Кирилл Святый отвеща: аще, Царю, окрестишися и злых дел престанеши, будеши одесную; аще же в поганстве жити будеши, ошуюю и твое место будет. Владимир же обеща креститися, а потом отвеща: разсужду и искушу добре о всех верах; и отпусти Философа с великими дары и честию.
38.
О СОВЕТЕ ВЛАДИМИРОВОМ О ВЕРАХ И ПОСЛАНИИ.
ПО ОТШЕСТВИИ ЖЕ Святаго Кирилла Философа созва к себе Владимир Боляр своих и советников в место Владимир над Клязьмою рекою лежаще, егоже назначи в свое имя, и в оном столицу или престол свой Царский от Киева пренесл бе
[14], и содержашеся Столица Царская тамо даже до Иоанна Даниловича, Князя Белорускаго, иже пренесе ю от Владимира в Москву град; и предложи Владимир Боляром своим слово о различных послах веры своя хвалити к нему присланных, и о Кирилле Философе от Царей Греческих бывшем, яко сказа ему от начала Света до воплощения Господня, о крещении, о воскресении, о Царствии Небесном и о муце геенской; и рекоша к нему Боляре и мудрые его: всегда всяк свое хвалит, а не хулит; ты же, Великий Княже, аще хощеши достовернее истину познати, имаши множество людей мудрых; пошли их во вся земныя Государства, да увидят и уведают всякую веру и како кто служит Богу; возвратившеся же известят тебе и нам о всем подробну и совершенно, яко самовидцы. По сицевом совете абие Владимир посла избранные мужи везде проведати о верах. Посланныи же от него по различным странам созираху и испытоваху о верах и служениях Божиих. Последи же приидоша и к Цариграду и известиша Греческим Царем, Василию и Константину братии, вину пришествия своего. Царие же возрадовашася и известиша Святейшему Патриарху Сергию о них. Тогда Святейший Патриарх повеле украсити Церковь, и сотвори праздник; а сам в дражайших Святительских одеждах с многими Епископы божественную совершати Литургию уготовася. Во время же Литургии Царие приидоша с посланными от Владимира в Церковь, и узревше послы красоту славы Божия, и услышавше сладостная пения, зело удивишася, не на земли, но на небеси мняхуся стояти, осени бо их в то время свет небесный, и быша в изступлении. По совершении же божественныя Литургии взяша Царие посланников в своя палаты, и сотворше им честь и учреждение и всяким изобилием удовольствовавше, отпустиша их с дарами.
39.
О ВОЗВРАЩЕНИИ ПОСЛОВ
к Владимиру.
ЕГДА ЖЕ ВОЗВРАТИШАСЯ посланники к Владимиру, паки Владимир Боляр и всех советников и мудрых своих созва, и повеле посланником пред всеми исповести, где бяху, что видеша, и что слышаша о всех верах и службах Богу. Посланники же поведаша, яко ниедино служение божественное и вера тако возлюбися, яко Греческая. Eгда бо (рекоша) нас введоша в Церковь Греческую, идеже они Богу своему молятся и чин службы Божия совершают, видехом тамо неизреченную красоту и благолепие в их Церкви, и пения к слышанию зело сладостны; идеже всех нас светел облак осени, и быхом в изступлении; мняшебо ся нам не на земли, но на Небеси в то время стояти, и несть нигде таковаго во всех народах и Церквах строения, красоты и служения Божия, яко у Греков. Сего ради веруем, яко истинная вера их есть и истинный Бог с теми точию людьми живет. И рекоша Боляре к Владимиру: аще бы вера Греческая не была правдива, то баба бы твоя Ольга не бы уверила; ибо жена бе зело мудра. Тогда Владимир благодатию Духа Святаго озарен, от тмы идолослужения аки от сна воспрянувши, Веру святую Греческую внешнима и внутреннима очима аки свещу ясну светящуюся на свещнице узре и позна, яко она есть праведна и истинна, и рече: что сотворю? Пойду в Землю Греческую и прииму грады и обрящу тамо учителей; и якоже умысли, сице и сотвори.
40.
О ПОХОДЕ ВЛАДИМИРА
в Греческую землю ради крещения.
СОБРАВШИ ЖЕ ВЛАДИМИР великую силу воинскую пойде к Таврикии, юже ныне Перекопом нарицают, идеже взя Кафу славный град Греческий, а потом главное всея Таврикии место Херсон, лежащее над морем Понтским прият, отъемши воду сладкую, рурами (каналами) подземными текущую, их же Херсонский протопоп Анастасий показа Владимиру на стреле написавши, и выстреливши ю с лука от града пред шатер его из Херсона. Абие посла к Греческим Кесарем в Константинополь, Константину и Василию, сыном Иоанна Земиски, извещая им, яко взя славный град пристанищный Херсон, и обещася тожде и Цариграду сотворити, аще бы не дали сестры своея Царевны Анны ему в жену. На то послание Кесари сице отвещаша: не достоит нам Христианским Монархом или Самодержцем тебе поганому Князю сестры своея дати в жену: но аще окрестишися, богомерзких идолов отступиши, а к истинному Богу и Господу нашему Иисусу Христу обратишися, сестру нашу в жену приимеши, и вящше ея, Царствие Небесное наследиши. Услышавши о сем Владимир рече: понеже ми вера ваша уже прежде от посланник моих извещенная возлюбися паче всех прочих, пришлите убо Епископа да крестит мя, и сами прибудите с сестрою своею ко мне, или ю пришлите ми в жену; аз же вам всю Таврикию и Херсон возвращу. Услышавши Кесари благоприятную весть, зело радовашася и сестру свою с всяким прошением увещеваху в союз брачный с Владимиром. Она же аще и намнозе возбраняшеся, но споручивши себе воле Божией, с плачем соизволи совету их. И тако вседше Кесари в судна, провождаду сестру свою Анну с многими Князи и Дворяны в путь к Херсону с Епископом. Но егда Царевна достигши Херсона провождашеся на палаты градския, абие волею Божиею паде слепота на очи Владимира, и нача усумневатися о Вере святой и крещении, непщуя казнь быти на ся от богов ради намерения своего к Вере Христианстей. Но Царевна посла к нему рекущи: аще не окрестишися, не избудеши слеботы; окрестишилися, то не точию слепоты телесныя, но и душевныя лишен будеши.
41.
О КРЕЩЕНИИ ВЛАДИМИРА
и о браце его.
И ТАКО ВЕЛИКИЙ САМОДЕРЖЕЦ Российский Владимир Светославич православнохристианскую Греческую веру приемши, повеле себе окрестити в Херсоне, лета от создания Мира 6416, а от рожества Христова 988; а по Кромерову свидетельству, лета от сотворения Света 6417, а от рождества Христова 989. Егда же нача креститися, бысть преславно чудо. Ибо коль скоро Владимир вступи во святую купель и Архиепископ Корсунский возложи нань руку благословляя его, да приимет Духа Святаго, абие от очию его слепота, аки чешуя спаде, и прозре ясно, аки никогда же боляше очима, и возда хвалу Богу в Тройце Святой славимому, глаголя:
ныне познах истиннаго Бога; и дано ему имя на святом крещении ново,
Василий. Тогда же крестишася при нем Боляре его и все воинство Росское. По сем Владимир сочетася браку с Анною Царевною и бысть веселение брачно и радость всемирная. Постави же в Корсуне и Церковь каменную Святаго Василия, в память имени своего крещеннаго, и возврати Херсон и Кафу и всю Таврикию Кесарем Греческим, Константину и Василию, а сам сотворши к ним целование и вземши благословение и Митрополита Михаила от Святейшаго Патриарха Цариградскаго Сергия, пустися водою до устия Днепра. Егда же прихождаше в Киев с новобрачною женою своею Анною, народ Киевский изыйде в сретение ему с велиею радостию; а Владимир привезл с собою и мощи Святаго Священномученика Климента и ученика его Агафаггела и иных много, такожде иконы, сосуды и различныя утвари Церковныя, и Протопопа Херсонскаго Анастасиа и многия Презвитеры, Диаконы, клирики, певцы, иноки и всякия мастеры созидания ради святых Божиих Церквей от Греческаго благочестиваго государствия приведе.
42.
О КРЕЩЕНИИ ВСЕГО НАРОДА
Киевскаго и всея России.
НАЗНАМЕНОВАНА ЖЕ ВЕЛИКИЙ Самодержец Российский Владимир день всему народу к святому крещению, и повеле по всем граде Киеве огласити сице: аще кто не будет уставлена времени на реце Почайной, или богат, или убог, стар, или млад, раб, или свободь, той будет Господу Иисусу Христу и мне противен. Услышавши же о сем людие, абие на урочное время без числа мужеска и женска полу на реку Почайну стекошася, и сам Царь Владимир со всем Сигклитом и освященным Собором прииде. Тогда Священницы и Диаконы облекшеся в священныя одежды, стояху при брезе на досках на реце Почайне устроенных, идеже при брезе ныне Церковь Святых Мученик Бориса и Глеба. Людие же идоша в реку, большаго возраста глубочае, маньшаго мельше, неции до выи, неции до пояса, а Священницы коемуждо имена давающе и молитвы над ними крещению прочитовающе, в воде поглужаху и крещаху во имя Отца и Сына и Святаго Духа.
43.
О КРЕЩЕНИИ СЫНОВ
Владимировых.
ТОГОЖДЕ ВРЕМЕНИ сам Михаил Митрополит всех дванадесять сынов Владимировых, их же име от различных жен, наедине в кринице, или на источнику окрести, и от того часа источник он над Днепром, идеже сынове Владимировы крестишася, и по сей день
Хрещатикпрослыся. А по святом крещении молися Господу Богу и Спасу нашему Иисусу Христу Владимир святый тако: Господи Боже, сотворивый небо и землю! призри на новокрещенныя люди твоя Российския, и даждь им, Господи, истинно познати тебе Бога истиннаго; утверди их в православной Вере, и мне помози, да побежду видимыя и невидимыя враги, Аминь. По сем Владимир посла по всех градех и весех во все свое Российское Государство крестити весь народ Российский; на не хотящаго же креститися, аки на сопротивнаго Богу и себе, жестокую казнь устави.
44.
О СЕМ, КОЛЬКРАТЫ РОССЫ
прежде Владимира даже до царствия его крестишася.
ИЗВЕСТНО БУДИ ВСЯКОМУ, яко и пред Владимиром Россияне по неким странам крестишася. Первое убо крестися Славеноросский народ еще от Святаго Апостола Андрея Первозваннаго. Егда бо прииде к горам Киевским и благослови их и крест водрузи на них, яко выше описася, в то время много людей тамо живущих Веры Христовы научи и окрести, яко многие Летописцы, изряднее же Преподобный Нестор Печерский сведетельствует. Такожде и в Великом Новгороде, шедши от Киева, многих к вере Христовой обрати и крещением святым просвети. Еще же Летописец Российский прилагает в летописи своей, яко и святый верховный Апостол Павел учи и проповедав Евангелие Христово в Мисии и Иллирике, по писанию и в Деяниях; а Мисия и Иллирик Славенская есть Земля. Потом Святый Апостол Павел посла Славяном ученика своего Андроника, единаго от седмидесят Апостол, иже учи и крести в Иллирик и Мисии, си есть в Болгарех, в Босне и в Мораве, идеже потом в Пании, или в Панонии Епископом бысть. Второе крестися Русь лета от Рождества Христова 863 в царство Царя Греческаго Михаила, Патриарху Константинопольскому сущу Фотию; от них же по прошению Князей Славенских Святополка, Ростислава и Коцела, прислани бяху Славяном учители Веры Христовы, Мефодий и Кирилл, сынове мужа нарочита, именем Льва от Солуня, и они по дару Духа Святаго преложиша Греческия книги Славенским языком, святое Евангелие, Апостол, и прочая.
Третие крестишася Россы лета от Рождества Христова 886, в царство Греческаго Царя Василия Македона, томуж Патриарху Фотию еще живу сущу, от них же прислан бысть крещения ради Россов, обладающу князю Олегу, Михаил Митрополит, иже пришед к Россом понуждаем бяше от них, да прежде чудо кое сотворит; а он вопрошаше их: коего бы чуда требовали? они же рекоша: книга Евангелие, яже учит Вере Христовой, да будет в огнь ввержена, и аще не сгорит, познаем оттуду, яко велик есть Бог, егоже ты проповедуеши. Тогда Митрополит повеле огнь велий посреде града возгнетити, и воздвигши руце на Небо, помолися Господу Богу, глаголя: прослави имя твое, Христе Боже! и сие рек, Святое Евангелие на бремя дров положи; и егда дрова все погореша и огнь погасе, обретеся Евангелие все цело и отнюд огнем не бысть врежденно. Толикое чудо видяще, мнози вероваша во Христа и крестишася. Четвертое крестися Русь лета от рождества Христова 955, в княжение Великия Княгини Ольги, жены Игоревы, а бабы Святаго Владимира, в святом крещении нареченныя Елены. Ибо возвратившися окрещенная от Константинополя в Киев, многих в России креститися сотвори. Но все те крещения четыри в России бывшая не укоренишася добре, ради частых браней и Князей неверных; понеже Ольга и сына своего Светослава обратити к Христовой вере не возможе.
Пятое совершенно и конечне крестишася Россы такожде от Константинополя, княжащу святому равноапостольному Великому Князю Владимиру, всея России Самодержцу, в царство Греческих Царей Василия и Константина, Патриаршеский Престол правящу Николе Хризоверху, лета от рождества Христова 988, по свидетельству Российскаго Летописца Нестора Преподобного, а по Стрийковскому лета от рождества Христова 980.
Третие крестишася Россы лета от Рождества Христова 886, в царство Греческаго Царя Василия Македона, томуж Патриарху Фотию еще живу сущу, от них же прислан бысть крещения ради Россов, обладающу князю Олегу, Михаил Митрополит, иже пришед к Россом понуждаем бяше от них, да прежде чудо кое сотворит; а он вопрошаше их: коего бы чуда требовали? они же рекоша: книга Евангелие, яже учит Вере Христовой, да будет в огнь ввержена, и аще не сгорит, познаем оттуду, яко велик есть Бог, егоже ты проповедуеши. Тогда Митрополит повеле огнь велий посреде града возгнетити, и воздвигши руце на Небо, помолися Господу Богу, глаголя: прослави имя твое, Христе Боже! и сие рек, Святое Евангелие на бремя дров положи; и егда дрова все погореша и огнь погасе, обретеся Евангелие все цело и отнюд огнем не бысть врежденно. Толикое чудо видяще, мнози вероваша во Христа и крестишася. Четвертое крестися Русь лета от рождества Христова 955, в княжение Великия Княгини Ольги, жены Игоревы, а бабы Святаго Владимира, в святом крещении нареченныя Елены. Ибо возвратившися окрещенная от Константинополя в Киев, многих в России креститися сотвори. Но все те крещения четыри в России бывшая не укоренишася добре, ради частых браней и Князей неверных; понеже Ольга и сына своего Светослава обратити к Христовой вере не возможе.
Пятое совершенно и конечне крестишася Россы такожде от Константинополя, княжащу святому равноапостольному Великому Князю Владимиру, всея России Самодержцу, в царство Греческих Царей Василия и Константина, Патриаршеский Престол правящу Николе Хризоверху, лета от рождества Христова 988, по свидетельству Российскаго Летописца Нестора Преподобного, а по Стрийковскому лета от рождества Христова 980.
45.
О УТВЕРЖДЕНИИ
совершенном Веры православныя в России и искоренении кумиров.
ВЕЛИКИЙ УБО САМОДЕРЖЕЦ Российский Владимир окрестившися сам, и Киевский и всея Россиския земли народ святым крещением просветивши, абие повеле бесовские кумиры и кумирницы разоряти, крушити и до основания искореняти, а на местах их божественныя Церкви созидати. Первейшаго бога или идола
Перунаповеле к конскому хвосту увязати и влещи в Днепр, приставивши дванадесят паличников, да биют его палицами, не яко чувственное древо, но да поругаются бесови, иже чрез него народ человеческий прельщаше. Привлекше же его к брегу, ввергоша в Днепр, и заповеда Владимир, да нигде же припустят его к брегу, дондеже минет пороги; нижае же порогов изверже его ветр под едину гору велику; яже и доныне
Перун горанарицается. Носитжеся и сия повесть еще от старых людей, яко некоего идола, егда влекоша верпыи с горы утопити в Днепр, биюще его нещадно, бес в том идоле восклицаше рыдая зело. И оттуду дорогу ту с горы нижае монастыря Златоверхаго Михаила нарекоша древле
Чортово беремище, си есть, тяжко чорту; ибо Славенски бремя, знаменует тяжесть. Воверженный же он болван в Днепр поплынул вниз; а неверныи людие идуще брегом, плакаху и зваху глаголюще:
выдыбай наш господару боже, выдыбай; си есть выплыви. Идол же той выдыбал, или выплыл тамо на брег, идеже ныне Монастырь Выдубицкий; и нарекоша место оно урочищем от выдыбания идола,
Выдыбичи, а потом
Выдубичи. Но и тамо егда неверныи людие хотяху взяти того идола, вернии же притекше, камень к нему привязаху и утопиша идола. Того ради поведают, яко первый при Владимире Митрополит Михаил, посадивши иноков на горе недалече от того
Чортова беремища, на свое имя и Церковь Святаго Архистратига Михаила созда, сея ради вины, зане яко Святый Архистратиг Михаил чорта от Небес низверже, тако и зде он же помогл от горы чорта в болване бывшаго низврещи. В
Выдубичахже Церковь чудеси тогож Святаго Архистратига Михаила создана того ради, зане яко в Хонех Святый Архистратиг Михаил чудо сотвори, погрузивши в реке неверных, тако и ту выдыбалаго, или выплывшаго в болване чорта помогл в водах погрузити. Повеле же Владимир поставити Каменную Церковь в Киеве Святаго Спаса великую, и на том месте, идеже кумир Перун бяше, Церковь Святаго Василия во имя на крещении святом себе данное созда, и прочия вся богомерзкия идолы овыя повеле в огнь вметати, овыя в воду, и капища бесовския искореняти не токмо в Киеве, но и везде по всем Российском своем Государстве, а Церкви божественныя от камения и древес созидати; и тако благочестивая Вера умножашеся и совершенно утвердашеся. Такожде и грады окрест Киева над реками Десною, Трубежем, Острем, Сулою, Сеймом созидаше. В тоже время и град над рекою Стугною основа и нарече его от своего имени
Василев, а ныне зовут его
Васильков.
46.
О ЦЕРКВИ ПРЕСВЯТЫЯ БОГОРОДИЦЫ
Десятинной в Киеве.
ВЕЛИКИЙ САМОДЕРЖЕЦ Российский Владимир, велию имея ревность к благочестию и благолепию Церквей святых, призвав мастеров от Греческаго Царствия, созда Церковь каменную велику и зело красну тщанием и иждивением своим Царским, украси ю иконами и всяким благолепием, якоже подобаше Церкви Царстей, и отда ей все, елико взял бяше в Херсоне сребро, злато, кресты, книги и прочия утвари, и поручи ю Анастасию Протопопу Корсунянину, и даде ей от имения своего Царскаго и от всех градов Государства своего повеле даяти десятину, жестокими клятвами то утвердивши, да его Устав Царский неврежден в вечные роды пребудет; и оттуду и доныне Церковь тая Божественная нарицается
Десятинная. Такожде и богоделий и странноприимных домов много построи нищих ради, сирот, бедных и странных, и всякими нуждами удоволи, лета от рождества Христова 996.
47.
О ПОХОДЕ ВЛАДИМИРОВОМ
к Суждалю, Ростову и к великому Новгороду.
ПОСЕМ ВЛАДИМИР СВЯТЫЙ с присланными от Святейшаго Патриарха Цариградскаго Николы тремя Епископы, Иоакимом, Феодором и Фомою, пойде из Киева в страны Суждальския и Ростовския, и заложи тамо град над рекою Клязмою и нарече его первым своим именем Владимир, в он же бе и престол свой царский из Киева хотяше пренести; а от Владимира в Москву град пренесе Князь Иван Данилович
[15]. Постави же тамо Владимир и Церковь во имя Пресвятыя Богородицы и Епископа Феодора остави: а оттуду иде в Ростов, идеже сокрушивши кумиры, на тех местех Церкви созда и Епископа Фому остави. Потом прииде к Великому Новгороду, и тамо кумира Перуна увязавши, повеле влещи в реку и бити палицами. Тогда бес обитавый в том идоле не возмогши стерпети толика поругания, нача велиим гласом восклицати:
горе горе мне, яко впадох в руце немилостивых людей, иже мя вчера аки бога почитаху, а ныне сицевую нестерпимую укоризну ми творят, что бых более делати имел, не свем. Но привлекше его на мост, ввергоша в реку: а он плывущи противу воде под великий мост, возопи воплем великим:
се вам Новгорожане в память свою оставляю!и абие от воды палицу некую на мост изверже. Иные сказуют, яко и доднесь того времене в год бывает глас некий на оном месте слышан. И тако от того времени вси Российскии, Белыи и Чермнии, вос&точныи, полунощныи и на полудне лежащии народы Веру святую православную от Греков прияша, и крещением святым просветившеся и укрепившеся совершенно в Христианстве, по обычаю и уставом Греческим под властию духовною Святейшаго Константинопольского Патриарха вселенскаго крепко и неподвижно пребывают от лета создания Мира 6497, а от рождества Христова 999, по свидетельству всех Летописцев Российских и Греческих и Польскаго Стрийковскаго в книзе 4, на листе 141.
48.
О РАЗДЕЛЕНИИ КНЯЖЕНИЯ
Российскаго от Владимира сыном его.
ВЛАДИМИР СВЕТОСЛАВИЧ по окрещении всего своего Российскаго Государства и по многих воинских трудах, седши на Царственном своем Престоле в Киеве, нача помышляти в себе, и яко мудрый строитель дому своего разсуждати, дабы сынове его дванадесять по смерти его в мире и неразрушимом братния любве союзе пребывающе, о Княжениях междоусобнаго нестроения и кровопролития не имели. Раздели убо им великое свое Государство Российское на дванадесять частей: Вышеславу старейшему сыну своему даде Великий Новгород, первый удел свой; Изяславу Полоцк, Святополку Туров, Ярославу Ростов; по смерти же Вышеслава, даде томуж Ярославу Новгород, Борису Ростов, Глебу Муром, Святославу Древляны, Всеволоду Владимир, Мстиславу Тму&торокань, Станиславу Смоленск, Судиславу Псков, Позвизду или Брячиславу Волынь, Луцко. Посла же с ними и Священники, заповедая им, аки отец сыном своим, да всяк от них в своем княжении тщится Веры Христианския учити и люди крестити во имя Отца и Сына и Святаго Духа; закон же Господень и благочестие неврежденно и непорочно хранити, а скверныя кумиры и капища их бесовския разоряти и до основания искореняти; божественныя Церкви созидати; всякия же сатанинския действия, яко древнюю злобу в новой Благодати истребляти, и игралищныя законопреступныя сонмища испраздняти и отнюд отметати. Юже заповедь сынове его, яко отеческую, с прилежанием соблюдаху; туюжде и всему православному народови Российскому, яко сыном его от воды и духа рожденным, всячески хранити и исполняти подобает.
49.
О ПРЕСТАВЛЕНИИ ВЛАДИМИРОВОМ.
ВЕЛИКИЙ КНЯЗЬ Владимир Светославич, всея России Самодержец, помощию Всемогущаго Бога просветивши всю свою Российскую Землю святым крещением, идолы вся и кумирницы искоренивши, Церквей же Святых много наздавши, Веру православную распространивши и крепко утвердивши, богоделей много построивши, и всякими потребами и нуждами милостивно и изобильно удовольствовавши, по толиких добродетелех своих в мире Господу Богу предаде дух свой, с Псаломником глаголя:
в руце твои, Боже мой, предаю дух мой, и преселися от земнаго к Небесному Царствию лета от создания Мира 6525, а от рождества Христова 1017
[16], месяца Июля дня 15 в Берестове; царствова лет 35, в неверии лет 8, а окрестившися 27. Святополк же погребе его в гробе мармуровом с великою жалостию и плачем всего народа в Церкви каменной Пресвятыя Богородицы Десятинной в Киеве, юже сам созда. Потом между Святыя, яко Апостола, его вчиниша и с Церковию Святою память преставления его дня 15 Июля почитати уставиша. Глава его ныне в Святой Великой Чудотворной Лавре Печерской Киевской предлагаема в велицей Успения Пресвятыя Богородицы Церкве бывает в день памяти его всем и во прочие дни, егда кто желает, к лобзанию.
50.
БЛАГОДАРЕНИЕ БОГУ ОТ ВСЕХ РОССОВ
о неисповедимом его даре.
БЛАГОСЛОВЕН БОГ И ОТЕЦ Господа нашего Иисуса Христа, отец щедротам, иже всем человеком хощет спастися и в разум истинный приити, яко не попусти до конца Русской нашей Земле в тме неверия и идолослужения пребывати: но яко чадолюбивый отец благоизволи светом благодати крещения святаго ю просветити и в разум истинный к познанию себе истиннаго в Святой Тройце славимаго Бога чрез Благовернаго и Равноапостольнаго Великаго Князя Владимира привести. Сего ради приидите Российстии народы всякаго возраста и чину православнии, поклонимся Отцу и его Сынови и Святому Духу, единому в триех упостасех славимому Богу, хваляще пресвятое его имя и великую на нас милость. Приидите, восхвалим и Святаго Равноапостальнаго Великаго Князя Владимира, отца и наставника и ходатая спасения нашего, иже яко вторый и чудный Святый Апостол Павел и великий Константин не от человек звание прият, но от Небесе, и в святой купели душевной купно и телесной избывши слепоты, и благодати Духа Святаго исполнившися, до конца идолы сокруши и искорени, и всю Землю Российскую святым крещением просвети, и всех Российских людей научи веровати и кланятися Отцу и Сыну и Святому Духу, в Святой Тройце единому Богу, ему же честь, слава, благодарение и поклонение в веки веков, аминь.