Сапожникова И.. Мечта о русском единстве. Киевский синопсис (1674)

Китай, а по том от великия ревности и вседушныя любве своея к Богу, прозван бысть Боголюбский; многия же Церкви и Монастыри построи и украси, и имениями и всяким довольством вспоможе: а по смерти отца своего, Великаго Князя Юрия Владимировича Киевскаго, сущи он Великий Князь всея Российския Земли, по великим добродетелем своим к Церквам Божиим и Монастырем, и по заповеди преставльщагося родителя своего, отда на Святую Великую Лавру Успения Пресвятыя Богородицы Печерскую Киевскую город свой Василев, ныне зовомый Васильков, родину Преподобнаго Отца нашего Феодосия Печерскаго, на реце Стугне, со всеми окрестными пределы его на вечные роды и часы; прида же к сему и городок Мическ над рекою Микою и другою Тетеревью, и Монастырь Святителя Христова Николая Чудотворца таможде лежащий. Архимандриту же Печерскому тогда бывшему и напотом быти имущему совершенную власть и правление утверди имети над Пустынным Никольским Монастырем в Киеве; а в Севере над тремя Монастырями, над единым Монастырем под городом Брянском Пресвятыя Богородицы, нареченным Свенским, над другим под Новгородком всемилостиваго Спаса, над третьим в Чернигове Успения Пресвятыя Богородицы Елецким. Укрепи же и определи всячески и се, да Киевский и всея России Митрополит, и всяк от Клирик Софийских над Святою Великою Лаврою Печерскою Киевскою и пределом ея Монастырем Пустынноникольским ниединыя имеет власти и правления, по узаконению Святейших Вселенских Патриархов Константинопольских. Понеже Преподобный Отец наш Антоний, первоначальный строитель и правитель Печерскаго Монастыря, принесе благословение от Святыя Горы, от державы Патриаршеския и от Епархии его Константинопольския; но да пребывает в соблюдении, хранении и заступлении Великих Князей Российских и наследников их в вечные роды и часы под страшным судом нелицемернаго судии и Бога вседержителя и клятвами Святых Апостол и Святых Отец 318, иже в Никеи, и всех Святых седьми Соборов Вселенских; еже содеяшеся в лето от создания Мира 6667, от рождества Христова 1159.

66.
О КНЯЖЕНИИ РОМАНА КНЯЗЯ
Смоленскаго в Киеве.

   ПО ПРЕСТАВЛЕНИИ БЛАГОВЕРНАГО Князя Глеба, седе на Престоле Киевском Роман, Князь Смоленский. Сей бе зело храбр и Литву порази; многих же пленивши, в жестоких узах держаше и тяжкия работы на них возлагаше, иных окованных в плуг впрягаше и ими аки волами поля окрест Киева оряше, и оттуду она притча израсте, егда един Литвин в плузе тягнущи научися языка Руска, и рече: Романе, Романе! худым живеши, Литвою ореши. Но не по долзе времени и он изгнан бысть из Киева от Ярослава Изяславича, иже сам седе на Столице Киевской и укрепися на ней.
   В лето от создания Мира 6686, от Рождества Христова 1172, преставися благоверная Княгиня Мария, жена Князя Всеволода Святославича, а дщи Короля Польскаго Казимира, совершена Инокиня суща, и погребена бысть в Церкви Монастыря живоначалныя Троицы, идеже и придел Святаго Кирилла в Киеве каменной, юже Церковь и Монастырь, ныне зовомый Кирильский, сама построила.

67.
О КНЯЖЕНИИ В КИЕВЕ
Ярослава Изяславича.

   СЕЙ БЛАГОВЕРНЫЙ КНЯЗЬ Ярослав Изяславичь, объемши Столицу Киевскую под храбрым Князем Романом, не возможе в мире владети. Ибо не по долзе времени Святослав Князь Черниговский воставши, поднесе войну на него и изгна его от Киева, Киев же разграби. А потом Ярослав не могий что сотворити, помирися с Святославом и умре на столице Киевской лета от Рождества Христова 1184. По нем седе в Киеве на княжении паки Святослав Князь Черниговский: обаче от внутренныя брани и от Половцов не име покоя до кончины своея. Преставижеся и погребен бысть в Церкви Святаго Кирилла Черниговской, лета 1198. По смерти же его Князь Рюрик Мстиславичь Княжение Киевское сильно прият, но не по долзе времени Рюрик, по прочих Российских Князей совету, пойман бысть от Романа Мстиславича, Князя Галицкаго, иже его в Киев приведши, купно с женою постриже в чин Иноческий, а сам возвратися в Галич. Видящи же Князь Святослав Мстиславичь Киевский Престол празден, взя Киев, хотя в нем владети: но Роман Мстиславичь Князь Галицкий, хотя быти нарицаем всея России Самодержец, изгна Святослава из Киева, а в нем на Столице посади Ростислава Рюриковича от уз пустивши; Престол же Киевскаго Самодержавствия пренесе от Киева в Галич и писася всея России Самодержец.

68.
О СЕМ, ЯКО НЕ БЛАГОСЛОВИ
Самодержцу Российскому Роману Владимирский Епископ Греческа закона воеватися со Христианами, кроме благословныя вины.

   ЛЕТА ОТ РОЖДЕСТВА ХРИСТОВА 1205, Великий Князь Роман, пристяжавши себе Самодержавствие Российское, посла с дарами к Епископу Владимирскому, прося благословения на зачатие войны противу Короля Польскаго Лешка. Но Епископ он отрече, и не благослови ему на сие дело глаголя: яко не подобает благословляти Христианом на Христиан войну подносити, кроме благословныя вины. Посем Великий Князь и Самодержец Роман живот смертию премени военною, и погребен бысть во Владимире Волынском честно.

69.
СПОР О СТОЛИЦЕ
Самодержавия Российскаго и изгнании Князя от Венгров, или от Угров.

   ПО СМЕРТИ ВСЕЯ РОССИИ самодержца Романа велие между собою нестроение и спор Князие Российскии о Престоле Самодержавия имеяху; иныи хотеша в преславном граде Киеве Престол имети, иныи в Галиче и Владимире; и не возмогше с собою любезно смиритися, избраша себе от Венгерския, или Угорския Земли Королевича Коломана, егоже Епископы на Российское Царство помазаша и венец Царский Винцент Кадлубок, Бискуп Краковский, возложи нань, и бысть Коломан всея России Самодержец. Но егда Коломан поят себе в жену сестру Лешка Белого именем Соломку, возгнегодоваша православноРоссийскии Князие, да не пременена будет православная Вера, абие избраша Мстислава Мстиславича Великоновгородского в Самодержца Российскаго, иже изгна Коломана, а сам на Престоле Царстем седе в Галиче, и венчан бысть от Епископов венцем Царским, егоже отбеже Коломан, и оглашен бе Царь и всея России Самодержец. Сей Мстислав Мстиславичь бяше зело храбр, Венгерскую, или Угорскую и Польскую силу порази и име Коломана с женою его во узах. По сем Великий Самодержец Российский Мстислав Храбрый преставися в Торску, и погребоша его в Киеве в Церкви честнаго Креста Господня, юже созда, лета от рождества Христова 1212. По смерти его паки Коломан Венгерский объят Престол в Галиче, но едва три лет пребысть на нем и умре лета от рождества Христова 1215, и от того времени Венгерскии Короли господствовати в России престаша. По Коломановой смерти седе на Престоле Царстем в Галиче Князь Данило Романовичь: но Изяслав собравши войско от Половцов, изгна Данила, а Галичь поступи Князю Михалку Свеногородскому. Ведомо же буди о сем, яко Галицкое Княжение, или царствие того ради зде предложися, яко и Киевское Самодержавствие пренесено бысть к нему, и оттуду не тако знамениты Князие Киевстии бяху. А отселе паки изряднее Князие Киевскии, от них же наипаче слово изъясняется, от Ростислава Рюриковича даже до нашествия злачестиваго Батыя.

70.
О КНЯЗЕХ РАЗНЫХ
Киевских.

   РЮРИК РОСТИСЛАВИЧ по смерти Романа, Великаго Князя Галицкаго и всея России, писавшагося Самодержца, от негоже по нужде пострижен бысть в черноризца, оставльши иночество, паки седе в Киеве на Престоле Княжения. Не сущу же ему в некое время в Киеве, восхити Престол его Всеволод Ольговичь Чермный, Князь Черниговский, и седе в Киеве. Обаче Рюрик собрався с силою, изгна Всеволода из Киева, а сам паки седе в нем на Престоле Княжения. Сия же между има многажды содевашася: но помиришася с собою, и пусти Рюрик Киев Всеволоду, а сам седе в Чернигове. По сем Великоновгородский Князь Мстислав Мстиславичь изгна Всеволода из Киева и посади в нем Мстислава Романовича, Князя Смоленскаго. Сего Князя Киевскаго Мстислава с прочиими Князи Российскими и с силою воинскою победиша Татаре, самаго же плениша, и другаго с ним Черниговскаго Князя: но Владимир Рюриковичь ушедши от тоя победы в Киев, сяде в нем на Престоле княжения; обаче по некиих временех и Владимир Рюриковичь от Половцов побежден и пленен бысть; а по нем седе в Киеве на княжении Изяслав Мстиславичь. На сего по летех неких воста Ярослав Всеволодовичь, и прииде к Киеву и изгна Изяслава, а сам в нем седе на княжении. Изшедши же Владимир Рюриковичь от пленения Половцов, изгна Ярослава из Киева, а сам паки седе в нем на Княжении: но не по долзе Владимира изгна из Киева Михаил Всеволодовичь, Князь Черниговский, и седе сам в нем на Княжении.

71.
О КНЯЖЕНИИ МИХАИЛА
Всеволодовича в Киеве, и о нашествии злочестиваго Батыя.

   ЛЕТА ОТ СОЗДАНИЯ МИРА 6748, от рождества Христова 1240, княжащу в Киеве Михаилу Всеволодовичу, присла злочестивый Батый Татаров своих соглядати Киева, и видевше величество и красоту его, удивишася, и возвращшеся поведаша Батыеви о преславном граде Киеве. Паки же Батый посла к Князю Михаилу прельщая его, да поклонится ему. Михаил же Князь поби послов Батыевых, а сам побеже из Киева в Угры. Тогда Ростиславичь, внук Давида Смоленскаго, услышавши, яко несть Князя в Киеве, прииде и седе в нем на княжении, егоже Данило Мстиславичь, внук Мстислава сына Изяславова, изгна из Киева и посади в нем Воеводу своего именем Димитра, и заповеда ему да хранит града и всячески бранит. Прииде же проклятый Батый с силою многою под Киев и обступи его, и нача пороки (машины) ставити и бити в стены градския. Людие же из града крепко бранишеся, а потом окрест Десятинныя Церкве Пресвятыя Богородицы окопашася, и на палаты Церковныя много людей возбегоша, яко от тяжести их палаты обвалишася и многих побиша: а Татаре всея России Стольный и по всей подсолнечной славный Царственный град Киев взяша, Церкви божественныя разориша, город и место огнем сожегоша, людей иных посекоша, а иных плениша, и все Государство Киевское ни во что обратиша, и Богу тако грех ради человеческих попустившу.

72.
О РАЗОРЕНИИ ПРЕКРАСНЫЯ
Святыя Великия чудотворныя Лавры Печерския Киевския.

   ТОГОЖ ЛЕТА ЗЛОЧЕСТИВЫЙ Батый разоривши преславный град Киев, прииде с погаными своими и к Святой Обители Печерской, идеже множество народа бе в затворе, и мужественно противу того врага Креста Господня места ради святаго стояше: но грех ради не возмогоша Христиане отбитися и уцелити. Ибо нечестивии варвары овнами, или таранами стены каменныя Монастырския столкши и до основания сокрушивши, в Святую Обитель внидоша, людей всякаго чина посекоша, иных плениша, и самую Небеси подобную Церковь Пресвятыя Богородицы Печескую оскверниша, от всего украшения обнажиша и Крест с главы Церковныя златокованый сняша, а верх до полуцеркве по окна повелением проклятаго Батыя испровергоша; такожде и верх олтаря великаго по перси иконы пресвятыя Богородицы избиша, и весь Монастырь со всеми украшениями и каменными стенами до основания искорениша и разметаша, яко о том подробну в древних Летописех Руских обретается; и от того времени преукрашенныя Божиею славою Девы обитель Святая Печерская до своего перваго бытия и красоты древния не возможе приити. Ибо нынешнее строение далече разно есть от перваго. Любящих же благолепие храма Богоматере иных смерть своею посече косою, иных нашествия иноплеменник мечь пояде, иным междоусобныя брани нестроение препятие содела: а ныне изрядным промышлением о всем православнороссийском народе, блаженныя памяти благочестивейшаго Государя нашего Царя и Великаго Князя Алексея Михайловича, всея Великия и Малыя и Белыя России Самодержца, и по нем наследника его Государева, Великаго Государя нашего Царя и Великаго Князя Феодора Алексеевича, всея Великия и Малыя и Белыя России Самодержца, благополучно царствующаго, красуется и всякия исполнена есть надежды.

73.
О БЛАГОВЕСТЕ
во Святой Обители Печерской к Церковному служению, откуду он начася.

   АЩЕ ОТ ЗЛОЧЕСТИВАГО Батыя в конечное разорение Святая Обитель Печерская прииде, и Небеси подобная Церковь Успения Пресвятыя Богородицы чрез многия лета пребываше в запустении: но в некоем Придельце, уцелевшем от поганых, Божественныя Службы страха ради в тайне совершахуся; Черноризцы же по лесах и вертепах скитающеся даже до обновления Церкве и Монастыря пребываху и в Соборе на службу Божию к Церкве прихождаху. Сего ради уставиша един мал звон, благовест нарицаемый, и непочасту в он ударяти, но надолзе, да все благовест он удобее слышат и от далеких и подземных мест сходитися к Церковному служению возмогут.

74.
О ЛЕТЕХ, В НИХ ЖЕ КИЕВСКОЕ КНЯЖЕНИЕ
и всея России самодержавствие под Татарским пребысть игом.

   ОТ НАШЕСТВИЯ ЗЛОЧЕСТИВАГО Батыя в Российскую Землю и от разорения преславнаго Царственнаго града Киева все Князие Российскии под поганския власти игом чрез полтораста лет пребываху и от Татарских Царей по воле их и хотению на Княжения бяху саждены; не повинующиижеся извержени бываху и всякие суды и споры главные Татарове творяху и совершаху. А от тых же Батыевых Татар прочии избраша себе селение в Крыме и Перекопе, и обладаша всеми окрестными полями; а Христиан оттуду изгнаша; а за Киевом все дикия поля далече лежащия и Подолье все, Литовским землям прилежащее, держаху, и Баскаки или Атаманы своя, аки бы Старосты, над Россами имеяху, иже и дани от них взимаху, и аки Государи Христианами обладаху, дондеже их поганую силу Великий благочестивый Князь Димитрий Московский победи и Мамая Царя Татарскаго на главу порази, яко на тринадесять миль, а верст на шестдесят и пять трупы поганские лежаша. О толикой победе, понеже ключися зде от части воспомянути, сего ради и известнее ю, яко достославную, судися за благословную вину на вечную память грядущим родом написати, да и прочии Христоименитии вои, ревнующе толикому древних витязей храброму против нечестиваго Мамая мужеству, дерзновенно и сами подвизаются на врагов Креста Святаго силою на нем пригвожденнаго Христа Господа укрепляемы.

75.
О ИЗВЕЩЕНИИ ВЕЛИКОМУ
Князю Димитрию, яко нечестивый Мамай идет войною на Русь.

   ВЕЛИКИЙ БЛАГОВЕРНЫЙ Князь Димитрий Ивановичь Московский услышавши, яко идет на него безбожный Царь Татарский Мамай с многими силами, неуклонно яряся на Веру Христову и народ Христианский, ревнуя погибшему Батыю скверному прародителю своему, опечалися вельми, и востав иде пред икону Христа Спасителя Миру, и падши на колена, нача с слезами молитися, да простит милостивый Бог грехи его и избавит Землю Росскую от безбожнаго Мамая. По молитве же воздвигшися, скоро посла по брата своего Князя Владимира к Боровску и по вся Князи, Боляре и Воеводы. Князь же Владимир прииде на Москву вскоре, и видев Великий Князь Димитрий брата своего, извести ему скорбь свою от нахождения поганых. Князь же Владимир соболезнуя толикой скорби, отвеща Великому Князю утешая его, глаголющи: на Господа возверзи печаль свою, и той тя препитает; нам же, Государю, лучше есть почетную смерть подъяти, нежели срамотень живот видети. Тогда Князь Великий Димитрий, поемши брата своего, пойде к Преосвященному Митрополиту Киприану и извести ему настоящую беду, яко безбожный Царь Мамай идет на Русь. Митрополит же отвеща ему глаголя: Божиим то попущением грех ради наших воста на ны нечестивый он Царь. Ты же, Государю, потщися прежде послати к нему дары и теми гнев его укроти, еда смирится и не пойдет Земли нашея пустотити. Аще же того ради не смирится, то Господь сам, имиже весть судбами, смирит его, яко Господь гордым противится, смиренным же дает благодать. Тако бо и Святый Василий Великий сотвори иногда, послав дары законопреступнику Иулиану, хотящу град его разорити, да утолится от ярости своея: но егда отступник он не преста от погибельныя ярости своея, абие сам Господь Бог на отмщение толикаго неблагодарствия посла воина своего, Святаго мученика Меркурия, да убиет гонителя невидимо, еже и собыстся.

76.
О ПОСЛАНИИ ОТ ВЕЛИКАГО
Князя Димитрия даров к Мамаеви.

   ВЕЛИКИЙ КНЯЗЬ Димитрий, повинувшися совету Митрополитову, избраннаго и благоразумнаго от предстоящих своих именем Захарию Тутчева, или Тушинина, посла с многими дарами к Мамаю, придавши ему и два толмача. Захария же дойде земли Резанския, и слышав, яко Олег Резанский и Олгерд Литовский приложилися к Мамаю, посла тайно к Великому Князю, извещая о толиком своих другов неприятелстве. Князь же Великий слышав то, нача сердцем двизатися и исполньшися печали, помолися Господеви глаголя: Господи Боже мой! на единаго тебе надеюся правду любящего. Аще бы враг пакости деял, претерпел бых; яко бо искони враг есть роду Христианскому.
   Сии же друзи и искрении мои тако на мя умыслиша. Суди же, Господи, по правде межи има и межи мною, да скончается злоба грешных. По молитве пойде Великий Князь с братом своим к Преосвященному Митрополиту и поведа ему о преложении Ольга Резанскаго и Олгерда Литовскаго к Мамаю, глаголя с плачем: согреших, Отче Святый пред Богом: но им никоея обиды не сотворих. Доволен бо есмь своим княжением; не вем же, чесо ради умножишася стужающии ми. Отвеща же Митрополит, яко суетная их вражда и неправедное восстание на мя, Княже Великий; сего ради не скорби, но просветися веселием о Бозе помощнице своем. Той тя избавит и прославит. Аще бо, Государю, человека хранит Бог, то не может его весь Мир убити; от крепкия же руки его и от всевидящаго ока владычняго где мощно укрытися и избыти? и теми словесы Архиерейскими укрепися Великий Князь Димитрий и на Господа печаль свою возложи.

77.
О ПОСЛАНИИ ПЕРВЫЯ СТРАЖИ.

   КНЯЗЬ ВЕЛИКИЙ Димитрий Иванович с братом своим и со всеми советниками подумавши, посла на стражу против Мамая крепких своих и разумных оружников, Иоанна Ржевскаго, Иакова Усатаго и Василия Тупника и многих с ними богатыров; и повеле им ехати со всяким опасением под Орду, языка доставати и правды о Мамаевом намерении доведатися. Потом же повеле Великий Князь грамоты разослати по всем градом, да все будут готовы на брань с безбожными Агаряны, и да снемлются все на Коломне в Успение Пресвятыя Богородицы.

78.
О ПОСЛАНИИ ВТОРЫЯ СТРАЖИ.

   ВИДЯЩИ ВЕЛИКИЙ Князь Димитрий, яко первая стража замедли, паки подумавши с братом своим и с Боляры, умысли послати вторую стражу и заповеда им возвратитися вскоре. На стражу же послани бяху Климент Полянин, Иван Свяслов, Григорий Судок и иныи многие с ними. Сии же пошедше, стретоша на пути Василия Тупника с языком, иже язык поведа Великому Князю Димитрию, яко неложно идет Царь Мамай на Русь, и како обослася с ним Олег Резанский и Олгерд Литовский, и не спешит, ждет осени. Услышавши то слово Великий Князь, нача молитися: Владыко Господи Иисусе Христе, воплотивыйся от чистыя девы Марии нашего ради спасения и избавлей нас от работы вражия! призри и ныне, пресвятый, на смирение наше, и смири, Господи, гордое сердце окаяннаго Мамая. Посем обращся к брату своему и к всем Князем и Воеводам глаголаше укрепляя их: гнездо есмы братие Великаго Князя Владимира Киевскаго, иже нас извел от тмы идолослужения и просветил истинною в Бога истиннаго верою. Поревнуем же ему, да биемся до смерти за Веру святую с погаными Татарами. Господь нам помощник, не убоимся; что сотворит нам человек? Аще кто от нас и умрет за Веру, то с Святыми мучениками в Небе венец восприимет. Отвеща же Князь Владимир, брат Великаго Князя, и вси с ним Князи реша: праведно сие есть, яко за Веру святую умирающии от Бога воздаяние приемлют вечное, и мы готовы есмы все на войне с Татарами и головы свои за Веру святую положити. Тое услышавши Великий Князь Димитрий, яко все дерзновенно тщатся к брани, зело утешился.

79.
О ПРИЕЗДЕ РУСКИХ КНЯЗЕЙ
и Воевод и многих ратий к Москве.

   ПО ПОВЕЛЕНИЮ ВЕЛИКАГО Князя Димитриа приспеша Русские Князи и Воеводы и многия воинства в урочное время на день Успения пресвятыя Богородицы к Москве, и все радующеся о Великом Князе своем Димитрии, едиными усты глаголаху: соверши, Боже, течение наше имени ради святаго твоего!
   Приидоша же Князи Белоезерскии с многими силами вельми чинно к бою устроенными, Князь Феодор Семенович, Князь Семен Михайлович, Князь Андрей Скимский, Князь Глеб Каргопольский, и Князи Ярославстии с своими силами, Князь Андрей Ярославский, Князь Роман Прозоровский, Князь Лев Курбский, Князь Димитрий Ростовский и иныи Князи и с ними многии Бояре и дети Боярские.

80.
О ХОЖДЕНИИ ЗАХАРИИ
в орду к Мамаю.

   ЗАХАРИЯ ПРИШЕД в Орду, и поемше его темныи Князи, поставиша пред Царем своим Мамаем. Захария же все посланные дары от Великаго Князя Димитрия положивши пред нечестивым Мамаем, рече: Государь наш Великий Князь Димитрий Ивановичь всея России в отчествии своем здравствует, и твоего Государскаго здравия присла мя вопросити, и сии дары присла Царския ради почести. Нечестивый же Царь возъярився и паче исполнися ярости и гордости окаянный, абие сверг башмак от правыя ноги, и рече: Захария! се ти дарую от великия славы твоея пришедшу от ноги моея отпадшее. Такова бо есть наша Царская почесть, аще кого хощем жаловати. Захария же воздаде честь мудре нечестивому Цареви. Царь же подивися мудрым ответом Захарииным и повеле присланныи дары воином взяти, рекущи: возмите себе то и купите себе плети на кони. Злато бо и сребро Князя Димитрия все будет в руку моею; Землю же его разделю служащим мне, а самаго приставлю стадо пасти верблюжее. Тогда Захария ревностию разжегшися о Государе своем и рече Мамаеви: что глаголеши сие таковому Великому Государю? Бог елико хощет, то сотворит, а не яко же ты хощеши. Предстоящии же хотяху Захарию убити: но запрети Мамай, и нача прельщати Захарию мягкими словесы, обещая его властеля в Руссии сотворити. Захариа же такожде лесть восприемши в сердце своем, да от рук его скорее свободится, рече к Царю: не подобает послу не совершивши посольства своего Государя, к иному Царю престати. Прежде повели ми книги дати посольныя и посольство совершу, и паки к тебе возвращуся Царю, да тако и тебе верен буду, яко не солгах первому Государю. Нечестивый же Царь уловлен бысть мудрыми словесы Захарьиными, и отпусти его писанием к Великому Князю Димитрию. Посла же с Захариею и четырех Князей честных и любимых своих, Постельника своего, да Дьяка, да Конюшего и Ключника, и с ними некиих Татар.

81.
О ГРАМОТЕ МАМАЕВОЙ
к Великому Князю Димитрию.

   ГРАМОТА ЖЕ ОТ ЦАРЯ Мамая сицевым образом написана бяше: «От восточнаго Царя, от большия Орды, от широких поль, от сильных Татар, Царь Царей Мамай и многим Ордам Государь: рука моя многими Царствы обладает, и десница моя на многих царствах облежит: ратаю нашему Димитрию Московскому. Ведомо ти есть, яко улусы нашими обладаеши, а нашему Царству пришед не поклонишися. Да есть ти ведомо и будет, днесь рука моя хощет тя казнити. Аще ли еси млад, то прииди ко мне и поклонишимися, да помилую тя и в твое место пошлю тя царствовати. Аще ли сего не сотвориши вскоре, вся грады твоя имам разорити и огню предати, и самаго тя велицей казни предам».

82.
О ОТШЕСТВИИ ЗАХАРИИ
от Мамая.

   ОТШЕДШИ ЖЕ ЗАХАРИЯ от проклятаго Мамая, благодарение возсылаше Богу, яко отпусти его Мамай, и не размыслив послати окаянных своих любимых с ним; и егда приближися к реце Оце и четыри Татарины с ним нарочитые и прочии послании Татарове на Русь, посла с дороги Захария тайно к Великому Князю вестника, чтобы послал в сретение ему, а Татаром рече: уже вас честно стретят от Великаго Князя. Великий же Князь скоро послал в сретение Захариино триста человек избранных Двора своего, и стретоша Захарию недалече от реки Оки. Захариа же дождався своих, абие повел хватати Татар и вязати; и взем грамату Мамаему, посланную к Великому Князю, предра ю на двое, и выбрав хуждшаго Татарина, вда ему раздранную грамату и отпусти его к Мамаю глаголя: рци безумному Царю, яко не обретох в человецех безумнейша его, а грамату его безумия пред светлыи очи Государя своего, Великаго Князя, не принесох и прочтох аз сам ю, и видев безумие Мамаево, посмеяхся. Прииде же Татарин и возвести сия вся Мамаю и грамату раздрану даде ему. Царь же нечестивый воскочи и нача яритися, и повеле всячески подвизатися воем своим на Русь.

83.
О ПРИШЕСТВИИ ЗАХАРИИ
из посольства на Москву.

   ЗАХАРИЯ ЖЕ ПРИИДЕ благополучно в славный град Москву и удари челом своему Государю, Великому Князю Димитрию Ивановичу, и всех Татар связанных приведоша ту. Князь же Великий радостен бяше вельми о возвращении Захариином и о умном посольстве его. Уведавши же известно от Захарии о неложном востании безбожнаго Мамая, и яко скоро грядет, нача радоватися наипаче и тешитися о Бозе, укрепляя брата своего и всех Князей Руских противу безбожнаго Мамая. Готовящижеся на брань, умысли ити в Монастырь Святыя живоначальныя Троицы на поклонение единому Богу, в Троице Святой славимому, и на восприятие благословения от Преподобнаго Отца Сергия чудотворца.