Сапожникова И.. Мечта о русском единстве. Киевский синопсис (1674)

   СВЯТОПОЛК ВЛАДИМИРОВИЧ погребши отца своего Владимира, седе самовольно на Престоле Княжестем в Киеве. Ибо не ему владети Киевом по отцу подобаше. Завистию же и богомерзкою похотию к самодержавствию поревновав братоубийце первому Каину, уби брата своего блаженнаго Князя Бориса в шатре над рекою Алтою, иже тогож лета месяца Июля дня 24 и погребен бысть в храме Святаго Василия в Вышгороде. Посем посла Святополк воины, да и Глеба такожде, яко и Бориса, убиют; еже и сотвориша, предавше смерти святаго страстотерпца Глеба на Смядине урочищу в пяти верстах от Смоленска, о чем в житии их совершеннее: а Свя&тополк веселяшеся, яко два брата единою смертию от отечества отлучи, Княжения же их Муромское и Ростовское в свою власть прият.
   Ярослав убо Князь ВеликоНовгородский, мстяся неповинныя смерти братии своея, Бориса и Глеба, пойде на лютаго братоубийца Святополка и взя Киев: а Святополк убеже в Польшу к Болеславу Первому, Королю Польскому, прося помощи. Болеслав же собрав воинство, пойде и порази Ярославле войско, а сам Ярослав побеже к Великому Новгороду. Тогда паки седе Святополк в Киеве чрез помощь Болеслава, Короля Польскаго. Но Ярослав с многою силою вторицею иде на Святополка и победи его на месте, идеже Святый Борис убиен бысть. Святополк же побежден побеже от рати паки к Болеславу: но на пути внезапною умре смертию, яко Польскии Летописцы пишут. Российстии же инако, яко Святополк бежащ чрез землю Польскую на пустыню между Чехи и Ляхи, тамо на некоем месте живо, яко Дафан и Авирон, от земли пожрен бысть, идеже и доныне есть пропасть.

52.
О КНЯЖЕНИИ ЯРОСЛАВА
в Киеве, лета от сотворения Света 6527, а от рождества Христова 1019.

   ЯРОСЛАВ ВЛАДИМИРОВИЧ по смерти брата своего Святополка прият Престол княжения Киевскаго и бысть всея России Самодержец. Укрепившижеся на княжении, обнови град Киевский и созда Церковь велику и предивну Святыя Софии, сиречь премудрости Божия, от камени по подобию Константинопольския, точию меньшую от нея, на месте том, идеже Печенегов победи, и украси ю всякою красотою, а при ней вежу (башню) сооружи, и верх позлати и врата граду каменныя, и Двери Златыя разоренныя от Болеслава обнови и направи ^[17]; на вратех же Церковь Благовещения Пресвятыя Богородицы созда сея ради вины, да от тех врат всегда радость и благия вести к нему в град приходят молитвами Пресвятыя Богородицы и Святаго Архангела Гавриила, радости благовестника. Созда же и Церковь Святаго Великомученика Георгиа от камене, во имя себе от святаго крещения данное, по правой стране Святыя Софии, и Церковь и монастырь Святыя Ирины недалече от Святыя Софии. Бе бо зело благочестив и любящ благолепие Храмов Божиих, и Духовнаго сана людей вседушно милующ. Сего Мстислав Владимирович изгнал бе от Киева, а потом добровольно паки ему Киев попусти, а сам в Чернигове на княжении Северстем седе. По смерти же Мстиславле прият Ярослав и его княжение и прилучи к Престолу Киевскому; и тогда крепким и правым Самодержцем, или Царем всея России писатися нача. Потом Ярослав Владимирович помышляя о времени смерти своея, раздели княжения Российския сыном своим: старейшему Изяславу даде Престол Киевский, Святославу Черниговский, Всеволоду Переяславль, Игорю или Григорию Смоленск и Владимир, Вячеславу Псков и Великий Новгород; и наказа сыны своя, да в любви пребывают и своими поделами довольствуются, и о сем имут попечение, дабы подданныи из вящше по милости их любили, нежели жестокости их боялися, и премени временную жизнь на вечную Ноемврия 7 дня, века своего 76 лета; погребен же бысть в Киеве в Церкве Святыя Софии, юже сам созда, в притворе Святаго Григория в гробе мармуровом. Российскии же Летописцы пишут, яко умре Ярослав в Вышгороде Февраля 20 в субботу 1ю Великаго Поста, а пожив лет 66; княжил же в Киеве лет 38.

53.
О КНЯЖЕНИИ В КИЕВЕ
Великаго Князя Изяслава Ярославича и о основании Церкве Печерския еще древяныя.

   ПО ПРЕСТАВЛЕНИИ БЛАГОВЕРНАГО Князя Ярослава Владимировича седе сын его старейший Изяслав на княжении в Киеве. Сей благоверный Князь по желанию и прошению Преподобнаго Отца нашего Антониа Печерскаго даде гору над пещерою, на нейже Преподобный Отец наш Феодосий, в то время уже Игумен Печерский, с братиею основа Церковь древяну велику и Монастырь ветхий огради столпием. Но егда Великий Князь Изяслав не хотяше брата своего Вышеслава (князя Полоцкаго) на прошение Киевских и Полоцких Боляр из поруба, или от уз свободити, восташа нань все, и причитавте ему обычай мучительск, изгнаша его от Престола; Вячеслава же, или Вышеслава свобождше, посадиша в Киеве на Княжении. Обаче Великий Князь Изяславль, чрез помощь и пришествие Короля Польскаго Болеслава Смелаго к Киеву с силою, паки седе на Престоле своем отческом в Киеве.

54.
О ВТОРОМ ИЗГНАНИИ
Изяслава из Киева, и об основании Великия Церкве Печерския каменныя, украшении ея, и о ограде каменной всего монастыря.

   ПОСЕМ, НАВАЖДЕНИЕМ душевнаго врага, воставше два брата, Святополк Князь Черниговский и Всеволод Князь Переяславский Ярославичи, на третьяго старейшаго брата своего Изяслава, изгнаша его от Престола княжения Киевскаго, и седе на Престоле Изяславле в Киеве Святослав Ярославич. Сей даде поле свое на поставление Церкви каменныя Печерския и Монастыря Великаго, и сам нача копати ров на основание ея. Основана же бысть по благословению Преподобнаго Отца нашего Антониа Печерскаго Игуменом Преподобным Отцем нашим Феодосием Печерским, яко о том, подробно в Патерике Печерском на листе 14 и 79. Сия же Небеси подобная Церковь яко неизреченным смотрением Божиим основася, тако и совершися, и преизящным благолепием внеуду и внутрьуду украшена бысть. Вся бо от злата мусиею, сиречь каменьми позлащенными, узорами и пестротинами различными предивно бяше высажденна, и иконами прекрасно росписана. Помост Церковный весь такожде от различных шаров камениями и всякими узорами бысть насажденный; главницы же позлащенны бяху, а крест на версе Церкве Великия ваги от самаго злата соделанный поставлен бысть. Самый Монастырь окрест каменными стенами обведен бысть на два стрельбища; в толстоту же, или в широту каменна стена бяше на сажень, и врата каменныя же, идеже ныне Церковь Тройцы Пресвятыя, бяху двои, едиными вхождаху Царие, Князие и чин Духовный, а вторыми народ общий и мертвых к погребению ношаху. Откуду великая слава и похвала бяше всему Российскому народу, яко в писанных древних Летописех Руских обретается.
   Немалу же времени прешедшу, помиришася с собою Князие, трие братия, Изяслав, Святослав и Всеволод Ярославичи, и попусти Святослав Киев Изяславу, а сам седе в Чернигове. И приидоша в то время в Русскую землю Половцы, с ними же егда Изяслав купно с братиею своею Святославом и Всеволодом брань военную соделаша, на той брани Изяслав пронзен бысть копием и умре, по свидетельству древняго Летописца Российскаго Преподобнаго Нестора черноризца Печерскаго; а по иным многим Летописцем инако. Пишут бо, яко изгнавше от Престола Киевскаго Князя Изяслава братия его, Святослав и Всеволод, внийдоша оба в Киев. Не по мнози же времени умре Святослав, и погребен бысть в Чернигове в Церкви Преображения Господня лета от Рождества Христова 1072, Декемврия 21 дня: а Всеволод абие прият Престол Киевский, егоже Король Польский Болеслав Смелый победи; а изгнаннаго Князя Изяслава брата своего стрыйнаго вторицею на Княжении в Киеве посади: а Всеволод седе на Княжении в Чернигове, егоже инии Князие Рускииж, Борис и Олег, пришедши с Половцами, под Черниговом на бою победиша, и убеже Всеволод в Киев к брату Изяславу Князю Киевскому; сей же не помня, ниже воздая зла за зло, но паче благим зло побеждаяй, прият Всеволода благодарно, яко брата; а посем собрав воинскую силу, пойде с Всеволодом к Чернигову противу Князей Бориса и Ольга, иже тамо с Половцами стан имеяху, и победи Изяслав Половцов, идеже и Борис Князь, сын Святославов, убиен бысть, а Изяслав Ярославич Князь Киевский по скончании бою, егда не опасно прохождашеся между пешим воинством своим и между трупы, внезапу от единаго воина Князя Ольга пронзен бысть между рамена копием, и от тоя язвы абие умре, егоже сын Ярополк привезши в Киев, погребе с великою жалостию и плачем всего народа Киевскаго в Церкви Пресвятыя Богородицы Десятинной. Бысть сей Князь Великий рачитель правды.

55.
О КНЯЖЕНИИ ВСЕВОЛОДА ЯРОСЛАВИЧА
в Киеве.

   БЛАГОВЕРНЫЙ КНЯЗЬ Всеволод Ярославич по смерти брата своего благовернаго Князя Изяслава Ярославича седе в Киеве на княжении, и постави Церковь каменную Святаго Архистратига Михаила на Выдубичах. Егда же бысть лета от рождества Христова 1083 великое моровое поветрие во всех Российских Княжествах, тогда от него и сей благоверный Князь Всеволод Ярославич скончася в Киеве, и погребоша его в Церкви Святые Софии Апреля 13 дня. Осташа же ся по нем два сына его, Владимир и Ярослав. Той Владимир, нареченный Мономах, Князь тогда бысть Черниговский, и боящися, да Свя&тополк Изяславич Князь Новгородский на княжение Киевское не приидет, (понеже сей Престол бысть дедичный отца его) призва его по доброй воле, а сам Княжения Киевскаго уступи, яко стрыеви своему.

56.
О КНЯЖЕНИИ В КИЕВЕ МИХАИЛА
Святополка Изяславича.

   ПО ПРЕСТАВЛЕНИИ БЛАГОВЕРНАГО Князя Всеволода прииде в Киев Князь Михаил Святополк Изяславич и седе на Престоле княжения Киевскаго, яко отчичь и дедичь. Посем побежден бысть от Половцов и мир сотвори с ними; ради же крепости покоя взя себе в жену дщерь Князя Половецкаго Тугоркана; а потом лета от создания Мира 6616, от рождества Христова 1108, созда сей благоверный Князь Михаил Святополк на имя свое Церковь каменную (бе бо на том месте исперва древяная) в Киеве на горе, Святаго Архистратига Михаила, и верх ея позлати. Тогож лета и трапеза каменная в Святой Обители Печерской совершися, яко в Русских древних Летописех обретается. Преставижеся благоверный Князь Михаил Свя&тополк Изяславич лета от Рождества Христова 1112, Апреля 16 дня, и погребоша его в Церкви Святаго Михаила Златоверхаго, юже сам созда. А бе сей Великий Князь Михаил тесть Болеславу Кривоустому, Князю Польскому. Веру же и любовь изряднейшую им к Святой Печерской Обители и к Преподобным Отцем Печерским. Ибо егда имеяше ити в поход каковый, или на брань воинскую, первее прихождаше с милостынею в Печерский Монастырь, и поклонившися в дому Пресвятыя Богородицы и пред гробом Преподобнаго Отца нашего Феодосиа Печерскаго, взимая благословение от Настоятеля, и тако отхождаше. Сице же и возвращшися от пути, возсылаше хвалу Господу Богу и Пресвятыя Богородицы представительству и Преподобных Отец наших Печерских молитвам воздаваше благодарение и поклонение. Сего ради благословляше его Бог в намерении, представительством Пресвятыя Богородицы и молитвами Преподобных Отец Печерских пособствоваше ему, победу даяй на супостаты и всяко благополучие, о чем в древних харатейных Летописех Русских обретается.

57.
О КНЯЖЕНИИ ВЛАДИМИРА
Всеволодовича Мономаха в Киеве.

   БЛАГОВЕРНЫЙ КНЯЗЬ Владимир Мономах, по преставлении Благочестиваго Князя Михаила Святополка умолен от всех, прииде от княжения Переяславскаго и Черниговскаго в Киев и седе на Престоле княжения в мире с всемирною радостию. Сей междоусобие всякое в Российских Князех усмири и в самодержавие приведе; Половцов и прочиих супостатов многащи побеждаше; зело бо храбр и мужествен бысть; и Генуенсов Влохов, владевших в то время в Таврици, идеже ныне Орда Перекопская, и Кафу славный град Стольный их взят, а потом вторицею брань воинскую с темиж Генуенсами над морем сведши, вызва на поединок Гетмана их Старосту Кафийскаго, егоже абие Владимир с коня мужественно копием исторгну и связаннаго приведе в полк свой, и сня с него чепь велику злату с различными камениями драгими и бисерми, и пояс с златом и камениями драгими, и шапку Княжую с дщицами златыми дорогоценну, еже все по себе остави посвящения ради во княжение и венчание благочестивым Самодержцем Российским. И от тоея славныя победы и храбрости своея Великий Князь Киевский Владимир Всеволодовичь наречеся МономахГречески, еже толкуется самоборец, или изрядный на средине воинской победоносец, и бысть всея России Самодержец.

58.
О СЕМ, ОТКУДУ РОССИЙСКИИ САМОДЕРЖЦЫ
венец Царский на себе носити начаша.

   В ДРЕВНИХ ПИСАННЫХ Летописех Руских о том же Великом Князе и Самодержце Российском Владимире Мономасе и се обретается, яко он егда в Господарства Греческии с великою силою пойде к Цариграду, тогда православноХристианский Кесарь Греческий Иоанн Комнин, видя яко не может противу стати великой силе Российской и изрядной храбрости Владимировой, посла к нему о мире Неофита Митрополита Ефесскаго, Епископа Милитскаго, и прочих от Сановников своих; посла же с ними и Крест от самаго животворящаго древа Креста Господня со всякою драгостию соделанный, снемши от выи своея, и венец Царский от главы своея возлож на блюдо злато, ожерелие, или гривну, юже сам на порфире своей Царстей носяше, и чепь от злата Аравийска, и иныя многоценныя дары, сице в послании своем написавши: «Иоанн Комнин, милостию Божиею православный Царь Греческий, великому в державных Князех Российских Владимиру радоватися. Понеже с нами единыя веры еси, паче же и единокровен нам; от крове бо великаго Константина Мономаха Кесаря Греческаго идеши; сего ради не брань, но мир и любовь подобает нам с собою, яко единокровным имети. Нашу же любовь да познаеши паче, юже имамы к твоему благородию, се посылаю ти венец Царский еще Константина Мономаха, отца матере твоея, и скиптр и диадиму и Крест с животворящим древом златый, гривну и прочая Царская знамения и дары, имиже да венчают благородство твое посланныи от мене Святители, яко да будеши отселе благовенчанный Царь Российския Земли». И тако от тых посланников венчан бысть Владимир Мономах венцем Царским; с Иоанном же Царем Греческим мир и любовь в вечные роды им. И отселе Великий Князь Владимир Мономах Царь Российский нарицашеся, и по нем наследники его, от них же все то достояние Царское, милостию Божиею, и доныне при великих Государех Царех и Великих Князех Московских и всея России Самодержцех достойно и праведно содержится. Отбретаетжеся в некиих Летописех, яко от Константина Мономаха, Кесаря Греческаго, присланы быша все тыи знамения Царския Владимиру Мономаху, Самодержцу Российскому. Но событие того по смерти Константина Мономаха, в лет больше пятидесят от прочих Летописцев Российских и от Барониуша и Стрийковскаго изъявляется. По Барониушевому бо свидетельству седе на Царствии Греческом Константин Мономах лета от рождества Христова 1042, а преставися 1054. Иоанн же Комнин бысть Царь Греческий лета от рождества Христова 1118, а преставися лета 1143. Владимир же Мономах седе на Престоле Княжения Киевскаго лета от рождества Христова 1114, а преставися лета от рождества Христова 1125. И тако по исчитанию лет, от предреченных свидетелей списанных, яве есть паче, яко от Иоанна Комнина, Кесаря Греческаго, нежели от Константина Мономаха прислан бысть венец Царский с прочими знамении и дарами Владимиру Мономаху Киевскому и всея России Самодержцу.
   По сем благоверный Князь и первовенечный Царь Киевский и всея России Самодержец Владимир Всеволодичь Мономах временное на вечное премени Царствие в Киеве, и погребен бысть в Церкви Святыя Софии при отчестем гробе в лето от создания Мира 6633, от рождества Христова 1126, Маия дня 10: а по смерти его паки Самодержавие Российское разделися.

59.
О КНЯЖЕНИИ МСТИСЛАВА
Мономаховича в Киеве.

   ПО СМЕРТИ БЛАГОВЕРНАГО Царя и Великаго Князя Киевскаго и всея России Самодержца Владимира Мономаха прииде из Переяславля сын его благочестивый Князь Мстислав Владимировичь и седе на Престоле отческом. Сей созда от камене Церковь в Киеве Святаго Великомученика Феодора великим накладом. Посем преставися лета от рождества Христова 1129, и погребен бысть в тойже Церкве Святаго Феодора, юже сам созда.

60.
О КНЯЖЕНИИ ЯРОПОЛКА
Мономаховича в Киеве.

   СЕЙ БЛАГОВЕРНЫЙ КНЯЗЬ Переяславский Ярополк Владимировичь, по преставлении брата своего благовернаго Князя Мстислава, седе в Киеве на Престоле отческом. Сей некоего времени прельщен бысть от Сенатора Короля Польскаго Болеслава Кривоустаго, именем Петра Влостовича, пойман, и связанный завезен в Польшу сицевым образом: Король Польский Болеслав Кривоустый услышавши о том, яко Князи Рускии съехавшеся в Киев, совет утвердиша воевати с Поляками, смятеся зело и нача с своими Сенаторами советовати, какобы совет Руских Князей ни во что обратился. Тогда между прочиими советниками нарочитый Сенатор вышереченный Петр Влостовичь отвеща глаголя: не возможно застановитися струи, донель же не прежде закопан будет источник; яко и древо доселе растет, дондеже из корени не ископается: такожде и расколы всякия не могут быти усмиренны, аще не будет глава раскол тех отъята. Но сие удобно есть соделати, наипаче тайным промышлением, нежели явною войною. На совершение же толикаго дела сам той Влостовичь отозвася, уверивши Болеслава, да на ухищрение его согласится со всею Польшею во всяком безстрашии; и вземши с собою неких своих верных служебников, побеже на Русь к Ярополку, аки бы разграбленный и изгнанный из отчизны своея от Болеслава Кривоустаго, оглашая его быти жестоким мучителем и всяким злоделателем и недостойным сана Королевскаго. Таковыми лукавыми словесы прельстившися Ярополк, уверил Влостовичу и благодарно приял его к себе, утешаяся, яко даде ему Бог по совету помощника. Влостовичь же он время от времени хульными словесы укаряя Болеслава непрестанно, вкрадеся тем своим промыслом в Ярополковы тайные советы и верное дружество. Некоего времени ключися Князю Ярополку на село свое в загородный двор поехати с немногими людьми, и Влостовичь таможе при нем ехал с своими слугами, чающе свое умышление благовременно совершити. Егда же Ярополк в малой своей дружине нача обедати, абие усмотре Влостовичь время, и емши Ярополка, связа его и на коня аки агнца возложивши, скоро побеже в Польшу, имея на сие дело везде кони розставленныи и перевозы на реках уготованныи; и тако привезл Ярополка здрава к Болеславу. Болеслав же Ярополка предаде стражем, а Влостовича за толикий промысл похвали и многими дарами ущедри. Обаче тогож лета искуплен бысть Ярополк от того лестнаго пленения и седе паки на Престоле отческом в Киеве; обидуже свою отмсти умышлением абие описанным зде.

61.
О СЕМ, КАКО ВОЗДАДЕ
Ярополк Болеславови хитрость хитростию.

   ЯРОПОЛК КНЯЗЬ Киевский тщащися всяко воздати лесть за лесть Болеславови, устроил единаго мужа умнаго, Угорский язык знающаго. Той приехавши к Болеславу Кривоустому, умысли себе быти изгнанным от Угор, аки бы Беля Король Угорский от всего имения обнажи, и от отчествия его изгна того ради, яко поборах (рече) Болеславе, за внуком твоим и всячески тщахся, дабы он был Королем Угорским. Болеслав же уверивши онаго мужа ухищрению, прият его честно и благохотно и дал ему великое Старостство Вислицкое, от Кракова стадий девять, и советником своим содела ради остроумия его. Егда же Болеслав со множеством начальников Польских выехал до Немецкаго города Бамберга, ради составления мирнаго с Кесарем Немецким Лотарием, Староста он Вислицкий видя время подобное к совершению коварства своего, пусти глас по окрестным волостем, аки бы Российскии Князи идут со многими войски искоренити Польшу; и заповеда именем Королевским, да вси Поляки со всеми имениями своими до Вислици города свозятся, яко в крепкое место. Егда же збегоша в множестве великом Поляки до Вислици, тогда Староста он ускори Ярополку известити, да потщится приити с войском под Вислицу. Приспевшу же Ярополку к Вислице во время урочное, отверзе ему вся врата градския, а Рускии вои въехавши в град, изсекоша оное велие собрание Поляков, и град зажегше, сами с великою корыстию и пленом нарочитых людей возвратишася. Но Болеслав мстяся толикия обиды, повоева Владимирское на Волыне Княжение огнем и мечем.

62.
ВТОРЫЙ ПРОМЫСЛ ОТМЩЕНИЯ
Ярополка над Болеславом.

   ЯРОПОЛК КНЯЗЬ Киевский, вторицею хотя свою обиду отмстити, настроил всех своих, да паче промыслом, нежели войною тщатся о изымании, или о убитии Болеслава Кривоустаго; и направиша хитростно Галичан, да Болеслава просят о привращении Князя своего Ярослава изгнанного от своих Руских Князей паки на Галичь, и дабы его сам собою возвести изволил на Престол Княжеский. Но и еще Ярополк наял Шляхту Угорскую порубежную, которые такожде лестию просили Болеслава о Ярославе, обещающеся быти ему во всем помощными и верными. Болеслав же Кривоустый желанию их давши веру, и не чающи злаго, с немногими вои Ярослава на Княжение Галицкое провождаше. Егда же приближашеся к граду Галичу, в начале полки Угорскии, исправленные к бою, стретоша Болеслава с поздоровленьем, и проминувше Поляков, засаду им созади соделаша; по Уграх же выехали Галичане, и такожде проминувше Поляков, за их войском стали в строю военном. Видящи то Болеслав, уразуме, яко впаде в сеть на лов уготованную; и егда нача о том советовати с Всебором Воеводою Краковским, Гетманом войск Польских, се обступиша полки к бою устроенные Болеслава; абие же и Ярополк приспе, и удариша на Поляки толь крепко, яко Гетман Польский Всебор не могий стерпети, побеже, и с ним большая часть войска Польскаго в бегство претворися, и сам Король Болеслав бяше уязвленный, и егда отбивающися уступаше, се под ним конь бяше уязвленный многажды, паде. Тамо некий прост воин подъемши Болеслава с земли, на коня своего всадил и от смерти его избавил. Того воина потом Болеслав честию нарочитою почтил: а Воеводе утекшему с бою заячий кожух и куделю с веретеном за дар посла, нерадение его и плохость заячую и дела женскии, а не мужескии теми знаменьими изъявляющи. Той Воевода с отчаяния своего сам себе смерть содела: а Болеслав Кривоустый по той над собою победе от презельныя туги живота лишися; над ним же Ярополк Мономаховичь, Великий Князь Киевский, толиким промыслом своим победу восприемши и лести оныя чрез Влостовича соделанныя нарочито отмстивши, пробави житие свое, елико Бог ему изволи, на Престоле отческом и почи о Господе. Погребен же бысть в Киеве в Церкве Святаго Андрея лета 1140.

63.
О РАЗЛИЧНЫХ КНЯЗЕХ
в Киеве, иже един другаго от Престола изгоняху.

   ПРЕСТАВЛЬШУСЯ БЛАГОВЕРНОМУ Князю Киевскому Ярополку Мономаховичу, седе в Киеве на Престоле княжения брат его родный Вячеслав Мономаховичь, егоже Всеволод Ольговичь, Князь Черниговский, похотию государствования раждизаем, изгна из Киева, а сам в нем седе на Престоле, на нем же пребываше полседьма лета, приложися к отцем своим лета от рождества Христова 1147. По нем восприят Престол Киевский сын Всеволодов Игорь. Но Изяслав Князь Переяславский изгна Игоря из Киева, а сам Престол Киевский объят; Игоря же вземши в свои руце, даде в узилище, а потом постриже в иноческий образ. Сего ради прочии Князие восташа на Изяслава, и брань с ним сотворши, победиша его и изгнаша из Киева; а Юрий или Георгий, брат Ярополков, с победою пришед в Киев, седе на Престоле деда своего. По сем Изяслав собрав силу воинственную, пустися в лодиях Днепром до Киева, и сотворши бой на воде, победи Юрия, иже вбеже в Переяслав: а Изяслав вторицею седе в Киеве. По мнозех же междоусобных бранех Князь Киевский Изяслав должное смерти воздаде, и погребен бысть в Киеве в Церкви Монастыря Святаго Феодора, в отческом гробе.

64.
ПАКИ О РАЗЛИЧНЫХ КНЯЗЕХ
в Киеве, и о изгнании их от Престола междоусобном.

   ПО ПРЕСТАВЛЕНИИ БЛАГОВЕРНАГО Князя Киевскаго Изяслава, прииде в Киев Ростислав Князь Смоленский и седе на Престоле княжения; а потом с прочими Князьми совокупльшися, пойде на Изяслава Давидовича, Князя Черниговскаго: но от него сам побежден бысть; а Изяслав Давидовичь внийде в Киев на княжение, егоже вскоре изгна от Престола Киевскаго Князь Юрий Владимировичь и седе на нем сам, аки дедич; страны же Российския сыном своим раздели: Андрееви даде Вышеград и Василев, Борису Туров, Глебови Переяславль, а Василькови Поросье, идеже БелаяЦерковь. Посем житие свое смертию премени лета от создания Мира 6666, от рождества Христова 1158. В тожде лето преставися благоверная Княгиня Анастасия Глебовая Всеславича, дщи Ярополка Изяславича, сидевши в вдовстве лет 40, и положена бысть в Церкви Пресвятыя Богородицы Печерской. Сия благочестивая Княгиня с своим Князем велию им любовь к Обители Пресвятыя Богородицы Печерской и к Преподобным Отцем Печерским, и много от имения своего даяше еще при животе своем, ревнуя благоверному Князю Ярополку, отцу своему, яже вда всю свою Отчину Неблскую Волость и Деревскую и Луцкую и около Киева; а по животе своем она Княгиня Анастасия отда и села со всем имением своим и скоты в Обитель Святую КиевоПечерскую.

65.
О КНЯЖЕНИИ МСТИСЛАВА ИЗЯСЛАВИЧА
в Киеве и о прочиих Князех Киевом владевших.

   ПО СМЕРТИ БЛАГОВЕРНАГО Князя Юрия Владимировича паки Изяслав Давидовичь, Князь Черниговский, Престол Киевский объят: но Мстислав Изяславичь тоейже зимы изгна его из Киева, а сам седе в нем на княжении. Егда же ему вскоре омерзе Столица отеческая Киевская, попусти ю стрыеви своему Ростиславу, Князю Смоленскому; но и тому такожде Киев не возлюбися, и попусти его Владимиру Мстиславичу. О сем услышавши Князь, в то время Владимирский, Мстислав Изяславичь, разгневася и изгна Владимира, а сам вторицею седе в Киеве на княжении. Посем Князь Андрей Юрьевичь, в то время Князь в Суждали, видя себе быти паче иных Князей ближайшаго, по отцу своем князю Юрию, Престола Киевскаго, абие собравши силу воинственную великую со многими Князьми Российскими, посла к Киеву сына своего Князя Мстислава, иже изгна Мстислава Изяславича из Киева, а в нем посади Глеба стрыя своего, Князя Переяславскаго; сам же возвратися к отцу своему Князю Андрею Юриевичу, иже прежде крещения нарицашеся